Vora mposht Flamurtarin me penallti të Luis Felipe dhe merr tre pikë të vlefshme në një sfidë me tension dhe kartonë

Në një sfidë të zhvilluar në stadiumin e Laçit, Vora arriti të marrë një fitore me shumë vlerë përballë Flamurtarit, falë një goli të shënuar herët nga Luis Felipe nga pika e bardhë e penalltisë.

Ndeshja nisi me intensitet dhe vetëm në minutën e 12-të, Vorës iu akordua një penallti pas një kontakti në zonë mes Kasallës dhe Nunjez. Luis Felipe u tregua i saktë nga pika e bardhë, duke kaluar skuadrën e tij në avantazh.

Pas golit, Vora vazhdoi të ushtrojë presion, me Gecin dhe Bardhin që provuan të dy nga distanca, por pa gjetur kuadratin. Në krahun tjetër, Flamurtari u përpoq të reagojë me disa tentativa të Trashit dhe Burardit, por pa rezultat konkret.

Në minutën e 45+6 mbyllet pjesa e parë me rezultatin 1-0 për Vorën. Gjatë kësaj pjese pati disa ndëshkime me karton të verdhë për të dy skuadrat, çka tregoi një ndeshje me shumë dyluftime.

Pjesa e dytë nisi me dy zëvendësime të shpejta nga Flamurtari që aktivizoi Maksutin dhe Ramanin në kërkim të barazimit. Gjatë minutave të para të pjesës së dytë, vlonjatët ishin më kërkues, duke bombarduar zonën me harkime të njëpasnjëshme.

Në minutën e 57-të, Karrica pati një mundësi të artë me një gjuajtje të fortë, por portieri Aleksovski u tregua vendimtar duke larguar topin në këndore. Në vijim, Vorës iu anulua një aksion për pozicion jashtë loje, ndërsa Flamurtari nuk arriti të konkretizojë disa raste të krijuara nga Maksuti dhe Todorovski.

Në minutat e fundit të ndeshjes u ndëshkuan me karton të verdhë Bardhi dhe Tabaku për Vorën dhe Ememe për Flamurtarin. U dhanë 5 minuta shtesë, por rezultati mbeti i pandryshuar.

Me këtë fitore, Vora tregon se është një skuadër kompakte dhe e organizuar, ndërsa për Flamurtarin kjo ishte një tjetër ndeshje ku mungesa e konkretizimit në sulm i kushton shtrenjtë.

“KORÇA BOOM”