9 Maji, dita që ndryshoi historinë e Europës

Më 9 maj, vendet anëtare të Bashkimi Europian kremtojnë Ditën e Europës, një datë simbolike që shënon fillimin e projektit europian për paqe, bashkëpunim dhe integrim mes vendeve të kontinentit.

Kjo ditë lidhet me deklaratën historike të bërë më 9 maj 1950 nga ish-ministri i Jashtëm francez Robert Schuman, i cili propozoi krijimin e një strukture të përbashkët për administrimin e prodhimit të qymyrit dhe çelikut mes shteteve europiane.

Qëllimi i këtij propozimi ishte shmangia e konflikteve të reja në Europë, vetëm pesë vite pas përfundimit të Lufta e Dytë Botërore. Ideja synonte vendosjen e prodhimit të qymyrit dhe çelikut nën një autoritet të përbashkët mbikombëtar, duke krijuar bazat për bashkëpunim mes vendeve që më parë kishin qenë kundërshtare në luftë.

Në vitin 1952 hyri në fuqi Komuniteti Europian për Qymyrin dhe Çelikun, ku bënin pjesë Franca, Gjermania Perëndimore, Italia, Belgjika, Holanda dhe Luksemburgu. Ky organizëm konsiderohet si hapi i parë drejt krijimit të Bashkimit Europian.

Më pas, në vitin 1957, u krijua Komuniteti Ekonomik Europian përmes Traktateve të Romës, duke zgjeruar më tej bashkëpunimin ekonomik dhe politik në kontinent.

Së bashku me kancelarin gjerman Konrad Adenauer, Schuman konsiderohet një nga arkitektët kryesorë të integrimit europian dhe pajtimit mes Francës dhe Gjermanisë pas dy luftërave botërore.

Në vitin 1985, liderët europianë vendosën që 9 maji të njihej zyrtarisht si Dita e Europës. Sot, Bashkimi Europian përbëhet nga 27 shtete anëtare dhe mbetet një nga projektet më të mëdha të bashkëpunimit politik dhe ekonomik në botë.

“KORÇA BOOM”