Adriatik LLapaj: Fakti që dështon njëherë në dashuri, nuk do të thotë se nuk do të dashurohesh më në jetë

Adriatik Lapaj, një nga zërat më të zhurmshëm të politikës së re dhe aktivizmit qytetar, nuk ka dhënë ende një përgjigje të prerë përsa i përket një kandidimi të mundshëm të tij për postin e kryebashkiakut të Tiranës. I ftuar në “Ditarin” e A2 CNN, Lapaj la të hapur të gjitha mundësitë, duke u shprehur: “Edhe mundet, edhe mundet jo – ngelet për t’u parë”.

Kjo përgjigje, ndonëse e paqartë, shërben si sinjal i qartë se Lëvizja “Shqipëria Bëhet” po e shqyrton me seriozitet sfidën për të konkurruar në kryeqytet, ndoshta për herë të parë në një garë të këtij niveli.

Megjithatë, rruga drejt një kandidature të suksesshme nuk është e thjeshtë. Tentativa e mëparshme për një bashkëpunim me “Nisma Thurje”, të drejtuar nga Endri Shabani, rezultoi problematike dhe krijoi distancime publike mes dy palëve. Po ashtu, raportet me partitë tradicionale janë të tensionuara: me Partinë Socialiste, Lapaj ka denoncuar një tentativë për "pazar politik", ndërsa me ish-aleatin Agron Shehaj ka përfunduar në dyert e gjykatave.

Në këtë kontekst, i mbeten pak mundësi reale për ndërtimin e një koalicioni tradicional. Partia Demokratike mbetet një opsion teorik, po ashtu edhe grupimi që pritet të ndërtohet rreth Ilir Metës dhe Sali Berishës. Por kjo do të përbënte një kthesë të fortë për Lapajn, i cili ka ndërtuar profilin e tij politik mbi një narrativë anti-korrupsion dhe ndarje nga e vjetra.

Vetë ai nuk e përjashton mundësinë e marrëveshjeve politike, duke përdorur një metaforë të goditur: “Fakti që dështon njëherë në dashuri, nuk do të thotë se nuk do të dashurohesh më në jetë”. Me këtë, Lapaj sinjalizon se nuk është kundër bashkëpunimeve, për sa kohë ato nuk cenojnë parimet dhe vizionin e tij për një Shqipëri ndryshe.

Ndërkohë, heshtja për një kandidim të qartë mund të jetë edhe strategjike. Zgjedhjet lokale në Tiranë janë ende larg dhe çdo lëvizje politike kërkon kohë, kalkulim dhe përgatitje. Nëse Lapaj do të vendosë të hyjë në garë, ai do të përballet me një sfidë të madhe – jo vetëm përballë makinës elektorale të PS-së, por edhe në ndërtimin e një alternative të besueshme dhe të organizuar në një qytet të madh si Tirana.

“KORÇA BOOM”