Akuza për shpifje dhe denigrim, Miri kërkon ndërhyrje ligjore pas deklaratave të Keijsit në Prime

Shtëpia e Big Brother VIP 5 ka qenë skenë e debateve të forta gjatë ditëve të fundit, ku në qendër të vëmendjes kanë qenë banorët Miri dhe Keijsi. Përplasjet mes tyre kanë kaluar nga tensionet verbale në akuza të rënda dhe ofendime personale.

Gjatë Prime-it të së shtunës, situata arriti kulmin, teksa Miri bëri publike vendimin për të ndjekur rrugën ligjore ndaj Keijsit. Këngëtari i kërkoi avokatit të tij që të ngrejë padi për prishje imazhi dhe denigrim të figurës së tij dhe të familjes, duke iu referuar një deklarate të Keijsit në Prime-in e kaluar.

Sipas Mirin, Keijsi kishte shpifur publikisht duke pretenduar se ai kishte blerë lule në një dyqan për një lidhje jashtëmartesore. Ai u shpreh se kjo çështje nuk duhet të mbetet vetëm në ekran dhe se nuk mund të lejojë që imazhi i tij dhe i familjes të denigrohet, duke theksuar se padia do të ndiqet deri në fund.

Miri shtoi se pas Prime-it të kaluar ka qenë vazhdimisht objekt i një fjalori fyes nga ana e Keijsit, duke përmendur etiketime dhe kërcënime verbale. Ai pranoi se edhe reagimi i tij ka qenë i ashpër, por theksoi se ka qenë një kundërpërgjigje ndaj ofendimeve të vazhdueshme, për të cilat kërkoi ndjesë për fjalorin e përdorur.

Nga ana tjetër, Keijsi reagoi duke mohuar akuzat dhe duke deklaruar se fjalët e tij kanë qenë kryesisht kundërpërgjigje ndaj provokimeve dhe ofendimeve që, sipas tij, kanë ardhur fillimisht nga Miri. Ai shtoi se është ndjerë i bullizuar në disa raste gjatë javës së fundit.

Debati mes dy banorëve mbetet një nga temat më të diskutuara të këtij edicioni të Big Brother VIP 5, ndërsa mbetet për t’u parë nëse paralajmërimi për ndjekje ligjore do të shkojë përtej ekranit.

"KORCA BOOM"