Arrestohet i dyshuari për vrasjen e Charlie Kirk, Trump e quan “Si Djalin Tim” dhe kërkon dënim kapital

Presidenti i Shteteve të Bashkuara të Amerikës, Donald Trump, deklaroi në një intervistë për Fox News se autori i vrasjes së Charlie Kirk është arrestuar. Ai bëri të ditur se arrestimi u bë i mundur falë informacionit të dhënë nga një person i afërt me autorin. Trump vlerësoi bashkëpunimin mes autoriteteve lokale, duke theksuar se ato bënë një punë të shkëlqyer në kapjen e të dyshuarit.

Presidenti amerikan shprehu dëshirën që vrasësi të përballet me dënimin maksimal, madje duke përmendur hapur mundësinë e dënimit me vdekje. Trump e përshkroi Kirk-un si “si djalin tim”, duke treguar lidhjen e ngushtë dhe respektin që kishte për të.

Charlie Kirk, i cili ndërroi jetë në moshën 31-vjeçare, ishte një nga zërat më të spikatur të konservatorizmit amerikan. Në moshën 18-vjeçare ai braktisi universitetin për të themeluar organizatën rinore konservatore Turning Point USA (TPUSA), e cila më pas u bë një nga lëvizjet më të mëdha në Shtetet e Bashkuara. Më 10 shtator, ai u qëllua për vdekje në një kampus kolegji në Utah, teksa ishte i angazhuar në një debat – aktivitet që e kishte bërë të njohur dhe të respektuar mes mbështetësve konservatorë.

Gjatë 13 viteve të udhëheqjes së tij, TPUSA u shndërrua në një organizatë gjigante me ndikim të madh në politikën amerikane. Sipas New York Times, deri në vitin 2023 të ardhurat totale të organizatës dhe krahut të saj lobues arritën në 92.4 milionë dollarë. Ajo ka hapur degë në 850 kolegje dhe organizon rregullisht evente me emra të njohur të së djathtës politike, përfshirë edhe vetë Donald Trump.

Kirk u bë një figurë e besuar për brezin e ri konservator. Një sondazh në platformën TikTok tregoi se, midis përdoruesve nën 30 vjeç që votuan për Trump në vitin 2024, ai konsiderohej zëri më me ndikim. Vlerësohet se kontributi i Kirk ndihmoi Trump të forconte mbështetjen e votuesve të rinj dhe të përmirësonte rezultatin krahasuar me zgjedhjet e vitit 2020.

“KORÇA BOOM”