Bashkia Maliq, fituese në një tjetër projekt të Bashkimit Europian – AGRI Adapt

Bashkia Maliq ka arritur një tjetër sukses të rëndësishëm në drejtim të zhvillimit rural dhe përshtatjes ndaj sfidave klimatike, duke u përzgjedhur si përfitues në projektin ndërkufitar “AGRI Adapt – Menaxhimi i Burimeve të Ujit për Përshtatjen ndaj Ndryshimeve Klimatike dhe Qëndrueshmërinë Bujqësore”, të financuar nga Bashkimi Europian.

Ky sukses është rezultat i përkushtimit dhe profesionalizmit të Koordinatorit të Integrimit në Bashkinë Maliq, z. Alban Myftarago, i cili ka ndjekur me përpikmëri çdo hap të aplikimit dhe përgatitjes së projektit, duke siguruar përfshirjen e bashkisë në këtë nismë strategjike për zonën.

Në takimin e parë zyrtar të konsorciumit, i mbajtur pasditen e djeshme në Selanik të Greqisë, u prezantuan objektivat dhe hapat konkretë të zbatimit të projektit. Qëllimi kryesor është ndërtimi i një rrjeti hidrologjik ndërkufitar dhe krijimi i një sistemi të hapur për mbështetje në vendimmarrje për vaditje (DSS), i cili do të ndihmojë drejtpërdrejt në mbrojtjen e bujqësisë ndaj thatësirave dhe ndikimeve klimatike.

Projekti parashikon:

• vendosjen e 10 stacioneve telemetrie në zonat pilot në Shqipëri dhe Greqi, për monitorimin në kohë reale të burimeve ujore,

• zhvillimin e një sistemi inteligjent për menaxhimin e vaditjes,

• organizimin e workshopeve me fermerët për përmirësimin e praktikave bujqësore,

• hartimin dhe zbatimin e një programi trajnimi që përfshin 18 webinare dhe 6 trajnime praktike për rritjen e kapaciteteve të aktorëve lokalë.

  
  

Partnerët ndërkombëtarë të projektit janë:

• Rrjeti i Bashkëpunimit të Njësisë Rajonale dhe Bashkisë Zakynthos (Greqi)

• Bashkia Parge (Greqi)

• Bashkia Souli (Greqi)

• Bashkia Maliq (Shqipëri)

• Drejtoria e Ujitjes dhe Kullimit Fier (Shqipëri)

  
  

Ky projekt është një tjetër dëshmi se vizioni europian i Bashkisë Maliq po shoqërohet me rezultate konkrete dhe të prekshme për komunitetin. Angazhimi për zhvillimin e qëndrueshëm, inovacionin në bujqësi dhe mbrojtjen e mjedisit mbetet një ndër prioritetet kryesore të këtij institucioni vendor.

“KORÇA BOOM”