David Dano futet në mbledhjen e Këshillit Bashkiak dhe ndërpret seancën. Procedohet penalisht për prishje të qetësisë, por kërkon vetëm një strehë për familjen

Një ngjarje e pazakontë ka ndodhur në Vlorë, ku një 27-vjeçar është proceduar penalisht nga policia, pasi ndërpreu mbledhjen e Këshillit Bashkiak duke hyrë pa leje në sallën e zhvillimit të saj.

Sipas njoftimit zyrtar të Policisë së Vlorës, specialistët për Hetimin e Krimeve kanë referuar materialet në Prokurori dhe kanë proceduar penalisht shtetasin David Dano, banues në Vlorë, për veprën penale “Prishja e qetësisë publike”.

Kallëzimi ndaj të riut është bërë nga punonjësja e Policisë Bashkiake, shtetasja A. R., 55 vjeçe, e cila deklaroi se Dano hyri në mënyrë të paligjshme në sallën ku po zhvillohej mbledhja e Këshillit Bashkiak të Vlorës, duke e ndërprerë atë për disa minuta.

Pas ngjarjes, vetë 27-vjeçari foli për emisionin “Breaking” në Top News, ku tregoi arsyet që e shtynë të reagojë në atë formë. Ai tha se prej kohësh po jeton në kushte të mjerueshme dhe se askush nuk ka reaguar ndaj kërkesave të tij për ndihmë.

“Po jetojmë në skamje. Askush nuk ktheu përgjigje. Aktualisht jetoj në një banesë të pabanueshme dhe asnjë institucion nuk do t’ia dijë. Kur kërkoj llogari në bashki, më drejtojnë në ministri, delegojnë përgjegjësitë. Unë kërkoj vetëm zgjidhje për strehimin,” – u shpreh ai.

Ngjarja ka sjellë reagime të përziera në rrjetet sociale, ku qytetarë të ndryshëm kanë shprehur edhe mbështetje për të riun, ndërsa pritet që institucionet përgjegjëse të japin një qëndrim zyrtar për rastin në fjalë.

“KORÇA BOOM”