Devolli nuk ndalet – Franko Kapllani zyrtarisht pjesë e skuadrës

Ekipi i Devollit vazhdon të jetë mjaft aktiv në merkato, edhe pse ende nuk ka nisur zyrtarisht përgatitjet në fushën stërvitore. Drejtuesit e klubit po punojnë me intensitet për të ndërtuar një grup të konsoliduar dhe konkurrues për sezonin e ri, dhe afrimet e reja nuk kanë munguar.

Së fundmi është mësuar se skuadra ka arritur marrëveshje me një emër të njohur për tifozët e Devollit – bëhet fjalë për mbrojtësin korçar Franko Kapllani. Ai është një nga talentet më premtues të futbollit vendas dhe ka qenë pjesë e Devollit edhe gjatë sezonit të kaluar, konkretisht në fazën e dytë të kampionatit, ku u shqua si një prej pikave më të forta në prapavijë.

Rikthimi i tij në ekip shihet si një lëvizje shumë pozitive, që sinjalizon fillimin e konsolidimit të mbrojtjes. Kapllani vlerësohet për qetësinë në lojë, përqendrimin dhe aftësinë për të lexuar situatat, duke i dhënë siguri pjesës së pasme të skuadrës.

Kjo lëvizje pritet të jetë vetëm një prej disa afrimeve të planifikuara nga klubi në javët në vijim. Edhe pse pa shumë zhurmë, Devolli po punon në mënyrë të organizuar për të krijuar një skuadër serioze që të synojë më lart në sezonin që po vjen.

Tifozët mezi presin që ekipi të zbresë në fushë, ndërkohë që gjithçka po ndërtohet me kujdes, gur pas guri. Dhe afrimi i Franko Kapllanit është padyshim një ogur i mirë për fillimin e një rruge të re.

“KORÇA BOOM”