4 gola në pjesën e parë, protesta dhe kartonë pa fund! Bylisi-Pogradeci mbyllet në barazim

Kategoria e Parë ka çelur fundjavën me një përballje të fortë mes Bylisit dhe Pogradecit, dy skuadra që synojnë ngjitjen në Superiore. Takimi i zhvilluar në Ballsh përfundoi në barazim 2-2, pas një ndeshjeje të luftuar, me emocione, protesta dhe tension në fushë.

Të katër golat u shënuan në pjesën e parë. Bylisi kaloi në avantazh që në minutat e para me Nyianguila, por Pogradeci reagoi dhe përmbysi rezultatin falë dy golave të Kazeem.

Vendasit arritën të barazonin në fundin e pjesës së parë, me një penallti që shkaktoi protesta të shumta nga lojtarët e Pogradecit. Sipas pretendimeve gjatë ndeshjes, faulli që çoi në 11-metërsh kishte nisur jashtë zonës së rreptësisë.

Përveç polemikave për vendimet e arbitrimit, një tjetër problem ishte gjendja e fushës, e cila ndikoi në rrjedhën e lojës dhe vështirësoi paraqitjen e të dyja skuadrave.

Pjesa e dytë nuk prodhoi gola të tjerë, por tensioni vijoi deri në fund, me shumë kartonë dhe ndërprerje të lojës. Bylisi e mbylli takimin me një lojtar më pak, ndërsa rezultati mbeti i pandryshuar në 2-2.

Barazimi bën që të dyja skuadrat të ndajnë pikët në një duel të drejtpërdrejtë mes pretendentëve, ku përtej spektaklit të golave nuk munguan polemikat dhe nervozizmi.

“KORÇA BOOM”