“Dori im do drejtësi” – Familja e gruas së Alban Hoxhës kërkon zbardhjen e vdekjes pas 11 vitesh pritje

Janë bërë plot 11 vite që familja Haka jeton me dhimbjen e thellë për humbjen e vajzës së tyre, Doriana Haka – bashkëshortes së portierit të njohur Alban Hoxha – e cila ndërroi jetë vetëm dy javë pasi solli në jetë djalin e tyre. Sot, më shumë se një dekadë më vonë, familja vazhdon të kërkojë drejtësi për humbjen që, sipas tyre, ka ardhur si pasojë e neglizhencës mjekësore.

Në një seancë të fundit gjyqësore, në prani të ekspertëve mjekoligjorë, nëna e të ndjerës, Hamide Haka, nuk i përmbajti dot emocionet.

“Më djeg shpirti, më dhemb zemra. Kam 11 vite që pres drejtësi. Dori im do drejtësi. Një fëmijë që rritet pa nënë do drejtësi. Ju lutem gjyqtar, më shikoni. Kam të drejtë – ndaj kam kërkuar drejtësi, jo hakmarrje,” u shpreh ajo me lot në sy.

Ajo shtoi se ndonëse drejtësia është vonuar, shpresa për një zbardhje të çështjes nuk është shuar.

“Shpresoj tek një drejtësi e vonuar, por jo e harruar.”

Edhe Enver Haka, babai i Dorianës, akuzoi sistemin gjyqësor për zvarritje të pafundme dhe theksoi se familja nuk do të ndalet kurrë në përpjekjen për të zbuluar të vërtetën.

“Kemi kaluar 11 vite të vështira, të lodhshme, me dhimbje dhe padrejtësi. Do të vazhdojmë deri në fund,” u shpreh ai.

Ngjarja tragjike që tronditi opinionin publik në vitin 2012 mbetet ende e pazbardhur plotësisht, ndërsa vendimi i shumëpritur i gjykatës pritet me ankth nga familja dhe opinioni.

“KORÇA BOOM”