Dronë, pajisje përgjimi dhe llastiqe gjuetie për protestuesit, zbulohet magazina e kontrabandës. Në pranga 23-vjeçari
Një magazinë e mbushur me pajisje elektronike dhe artikuj pa dokumentacion është zbuluar nga Policia e Tiranës në kuadër të operacionit të koduar “Infrastruktura”.
Në pranga ka përfunduar një 23-vjeçar, i cili dyshohet se tregtonte llastiqe gjuetie dhe sfera metalike për pjesëmarrësit në protestat e zhvilluara ditët e fundit, me qëllim goditjen e punonjësve të Policisë dhe institucioneve.
Sipas njoftimit zyrtar, i riu, shtetasi Orges Male, banues në Tiranë, u kap në flagrancë në rrugën “Tre Dëshmorët”, teksa po shiste llastiqe gjuetie së bashku me sfera metalike. Mallrat u sekuestruan si prova materiale.
Pas arrestimit, uniformat blu kontrolluan edhe një magazinë që 23-vjeçari posedonte në rrugën “Kol Koçi”, ku zbuluan mbi 450 pajisje dhe artikuj të dyshuar si të kontrabanduar, për të cilët ai nuk dispononte dokumentacion.
Mes sendeve të sekuestruara janë 239 dronë të madhësive të ndryshme, 75 llastiqe gjuetie, sasi të konsiderueshme sferash metalike, 44 telefona celularë, si dhe pajisje për lokalizimin GPS të automjeteve.
Në magazinë u gjetën gjithashtu pajisje elektronike, syze me videoregjistrues, pajisje DVR, kamera për automjete, detektorë për zbulimin e GPS-ve dhe kamerave, pajisje lazer, orë inteligjente, çanta me hapje përmes gjurmëve të gishtave dhe artikuj të tjerë teknologjikë.
"Zbulohet një magazinë me mbi 450 pajisje dhe artikuj (dronë, dedektorë, pajisje zbuluese/regjistruese, etj) të kontrabanduar.
Në magazinë u gjetën edhe 75 llastiqe gjuetie dhe një sasi të konsiderueshme me sfera metalike.
Vihet në pranga 23-vjeçari që posedonte pajisjet/artikujt, dyshohet për qëllime të kundërligjshme.
Ai u kap duke iu shitur llastiqe dhe sfera, pjesëmarrësve në protestat e ditëve të fundit, për të goditur punonjësit e Policisë dhe insitucionet.
Specialistët e Sektorit për Hetimin e Krimeve Ekonomiko-Financiare, si rezultat i administrimit të menjëhershëm të informacioneve të siguruara gjatë punës operative, finalizuan operacionin e koduar “Infrastruktura”, gjatë të cilit u arrestua pas konsultimit me prokurorin, shtetasi O. M., 23 vjeç, banues në Tiranë.
23-vjeçari u kap në flagrancë në rrugën “Tre Dëshmorët”, duke iu shitur pjesëmarrësve në protestë, 30 llastiqe gjuetie me sfera metalike, që u sekuestruan me cilësinë e provës materiale.
Më tej, u krye kontroll në një magazinë që posedonte 23-vjeçari, në rrugën “Kol Koçi”, ku u gjetën:
-239 dronë të madhësive të ndryshme;
-75 llastiqe gjuetie; një sasi të konsiderueshme me sfera metalike;
-44 celularë;
-17 Powerbank, 10 pajisje për lokalizimin GPS të automjeteve; 11 llamba LED; 3 drynë elektronikë me GPS;
-1 pajisje elektronike me antenë (RFGS Detector);
-3 palë syze me videoregjistrues;
-pajisje DVR;
-7 pajisje Bluetooth për automjete; 8 pajisje Blackbox me kamera për automjete;
-1 kompresor, 8 elektrikë dore; 6 pajisje lazer;
-2 pajisje Xiaomi Smart Plug 2; 3 pajisje elektronike; 5 pajisje K-68 për zbulimin e GPS-ve dhe kamerave;
-12 pajisje kompjuterike (mouse); 7 pajisje me lojëra kompjuterike; 7 pajisje Watch 10 Pro Max;
-8 çanta me hapje me gjurmë gishtash.
Shtetasi O. M. nuk dispononte asnjë dokumentacion për këto pajisje/artikuj.
Vijon hetimi për të dokumentuar veprimtarinë kriminale të shtetasit O. M., si dhe për të identifikuar dhe nxjerrë përpara përgjegjësisë penale, shtetas të tjerë të përfshirë në të.
Materialet procedurale iu referuan Prokurorisë, për veprime të mëtejshme, për veprat penale “Tregtimi dhe transportimi i mallrave që janë kontrabandë”, “Kontrabanda me mallra të tjera”, “Fshehja e të ardhurave”, “Mospagimi i taksave dhe tatimeve” dhe “Ushtrimi i një aktiviteti tregtar të paligjshëm ose të parregjistruar në organet tatimore dhe moslëshimi i kuponit tatimor, dëftesës ose faturës tatimore”, njofton policia./ Pamfleti
“KORÇA BOOM”
