E DHIMBSHME/ U zhdukën më 27 qershor, gjenden dy trupat e pajetë të babë e bir

Një trup i dytë është gjetur në Onhaye të Belgjikës, vetëm një ditë pasi në të njëjtën zonë u zbulua trupi i një fëmije.

Autoritetet dyshojnë se bëhet fjalë për 5-vjeçarin Tymeo Brigou dhe babain e tij, Bryan Brigou, 29 vjeç, të zhdukur që prej 27 qershorit.

Trupi i dytë u gjet të martën në mëngjes, rreth 10 metra larg trupit të fëmijës, në një zonë të pyllëzuar pranë autostradës N97. Të dy trupat ndodheshin në një fazë të avancuar dekompozimi.

Prokurori i Namurit, Etienne Gaublomme, tha se trupi i dytë ka shumë gjasa t’i përkasë Bryan Brigou, por identifikimi zyrtar ende nuk është përfunduar.

Për trupin e parë, autoritetet kanë gjetur elementë që mbështesin dyshimin se bëhet fjalë për vogëlushin Tymeo, mes tyre edhe veshje dhe të dhëna të tjera përshkruese.

Babë e bir ishin parë për herë të fundit më 27 qershor në Onhaye. Të nesërmen, makina e Bryan Brigou u gjet e braktisur pranë një fushe futbolli, rreth dy kilometra në vijë ajrore nga vendi ku u gjetën trupat.

Zona ishte kontrolluar edhe më herët, përfshirë nga ajri. Megjithatë, një dëshmi e re e marrë të hënën i orientoi hetuesit drejt një sektori tjetër, ku më pas u zbuluan trupat.

Hetimi vijon për të përcaktuar identitetin përfundimtar të dy viktimave dhe rrethanat e vdekjes së tyre.

“KORÇA BOOM”