E vrava për një arsye të fortë” – dëshmia e parë e Bertil Alliaj pas arrestimit në Selenicë

Autori i dyshuar i vrasjes në Selenicë, Bertil Alliaj, është marrë në pyetje për më shumë se një orë nga hetuesit menjëherë pas arrestimit të tij. Alliaj, i cili akuzohet për ekzekutimin e kushëririt të tij Dalan Alliaj në fshatin Gjorm të Selenicës, ka dhënë një dëshmi të shkurtër dhe enigmatike, duke pohuar se krimin e ka kryer për një “arsye të fortë”.

“E vrava për një arsye të fortë që s’mund ta them tani, pasi i kisha thënë disa herë që duhet të reagonte”, – ka deklaruar ai para oficerëve të policisë.

Sipas burimeve hetimore, Bertil Alliaj ka refuzuar të japë më shumë hollësi në këtë fazë, duke shtuar se “ndoshta në një moment tjetër do të jetë gati të tregojë arsyen e vërtetë pas ngjarjes”. Dëshmia e tij e pjesshme ka ngritur më shumë pyetje sesa përgjigje, ndërsa hetuesit po përpiqen të zbardhin motivin e saktë të krimit që tronditi zonën e Selenicës.

Vrasja ndodhi në derën e shtëpisë së viktimës në fshatin Gjorm, ku Bertil Alliaj dyshohet se i është afruar kushëririt dhe ka qëlluar ndaj tij me armë zjarri gjashtë herë. 36-vjeçari u transportua menjëherë drejt spitalit të Vlorës, por mbërriti pa shenja jete.

Pas ngjarjes, forcat e policisë dhe FNSH organizuan një operacion të gjerë në zonë, duke bërë të mundur arrestimin e autorit pas mesnate. Ai rezulton person me precedentë penalë dhe është një nga autorët e masakrës së Çoles të ndodhur në vitin 2015, ku humbën jetën tre persona: Akil Hasanaj (alias Haki Rakipi), Ardi Velaj dhe Albi Limaj.

"KORCA BOOM"