Egnatia s’ka mëshirë për Bylisin, triumf me rezultat tenistik

Egnatia ka arritur një fitore të thellë 5-1 ndaj Bylisit në ndeshjen e javës së 12-të të Kategorisë Superiore, e zhvilluar në stadiumin “Arena Egnatia”. Protagonisti absolut i takimit ishte sulmuesi Bakayoko, i cili realizoi katër gola dhe udhëhoqi skuadrën e Edlir Tetovës drejt tri pikëve të sigurta.

Ndeshja nisi me ritëm të lartë dhe që në minutën e gjashtë Bakayoko zhbllokoi shifrat, pas një pasimi të saktë nga Albano Aleksi. Situata u vështirësua për Bylisin në minutën e 17-të, kur Kane u ndëshkua me karton të kuq, duke e lënë ekipin me 10 lojtarë.

Egnatia shfrytëzoi menjëherë superioritetin numerik dhe në minutën e 25-të Bakayoko realizoi golin e dytë personal, me skuadrën rrogozhinase që dominoi plotësisht pjesën e parë. Pas pushimit, ai vazhdoi spektaklin duke shënuar edhe golin e tretë në minutën e 52-të dhe më pas golin e katërt nga pika e bardhë në minutën e 63-të.

Bylisi arriti të shënojë golin e nderit me Mouctar në minutën e 67-të, por Egnatia mbylli gjithçka në minutën e 87-të falë golit të Buric, duke shpërblyer një tjetër paraqitje dominuese.

Takimi u mbyll 5-1, duke konfirmuar formën e shkëlqyer të Egnatias dhe forcën sulmuese të skuadrës nën drejtimin e trajnerit Edlir Tetova.

"KORCA BOOM"