Eksploziv pranë një makine, policia dyshon për mesazh paralajmërues

Një shpërthim me lëndë plasëse është regjistruar gjatë orëve të natës në Krujë, ku objektiv ka qenë një automjet i tipit "Fiat". Si pasojë e shpërthimit janë shkaktuar vetëm dëme materiale, pa persona të lënduar.

Grupi hetimor ka sekuestruar pamjet e kamerave të sigurisë në zonë, në të cilat shfaqet një person i dyshuar që vendos lëndën plasëse pranë automjetit dhe më pas largohet në këmbë. Sipas burimeve, autori kishte veshur rroba të errëta, dyshohet për të vështirësuar identifikimin e tij nga kamerat.

Nga hetimet paraprake rezulton se sasia e lëndës plasëse ka qenë e vogël dhe ishte vendosur në pjesën e përparme të automjetit, pranë kofanos. Për këtë arsye, policia dyshon se ngjarja mund të ketë pasur karakter paralajmërues ndaj pronarit të mjetit.

Automjeti është në pronësi të Dervish Gunit, i cili, sipas deklarimeve të dhëna para hetuesve, ka mohuar të ketë konflikte me persona të tjerë dhe është shprehur se nuk ka dijeni për motivet e ngjarjes apo autorët e mundshëm.

Megjithatë, policia nuk përjashton asnjë pistë hetimi dhe po verifikon edhe mundësinë që ngjarja të lidhet me një konflikt pronësie.

"KORÇA BOOM"