Filo shpërthen me mesazh të fortë: “Skënderbeu po rikthehet më i fortë se kurrë

Rikthimi i Skënderbeut në elitën e futbollit shqiptar ka rikthyer entuziazmin në Korçë, duke e kthyer 19 prillin në një ditë feste për tifozët bardhekuq. Skuadra siguroi matematikisht ngjitjen në Superiore, duke ndezur optimizëm për të ardhmen e klubit.

Pas këtij suksesi të rëndësishëm, urimet dhe vlerësimet kanë qenë të shumta, jo vetëm nga sportdashësit, por edhe nga përfaqësues të institucioneve vendore. Mes tyre spikat reagimi i kryebashkiakut të Korçës, Sotiraq Filo.

Përmes një postimi publik, Filo e cilësoi rikthimin në Superiore si një moment krenarie për qytetin dhe një tregues të qartë të ambicieve të klubit. Ai vlerësoi gjithashtu paraqitjen bindëse të skuadrës në fitoren 4-0 ndaj Kastriotit, rezultat që vulosi ngjitjen në elitë.

“Rikthehemi atje ku na takon! Djemtë e Skënderbeut kanë dhuruar një performancë spektakolare dhe një fitore bindëse 4-0 ndaj Kastriotit, duke vulosur në mënyrë të merituar rikthimin në Superiore për sezonin e ardhshëm”, shkruan kryebashkiaku.

Më tej, ai thekson se ky sukses nuk përfaqëson vetëm një ngjitje kategorie, por një deklaratë force dhe ambicieje për klubin korçar. Sipas tij, me përkushtim dhe besim të palëkundur, Skënderbeu po rikthehet më i fortë se kurrë për të synuar majat e futbollit shqiptar.

“Ky nuk është thjesht një rikthim, por një deklaratë force, ambicieje dhe krenarie për gjithë Korçën”, vijon Filo në mesazhin e tij.

Në përmbyllje të reagimit, kryebashkiaku shpreh optimizëm për të ardhmen, duke nënvizuar se objektivat e klubit shkojnë përtej rikthimit në Superiore: “E ardhmja premton suksese edhe më të mëdha!”

“KORÇA BOOM”