Fshati Dardhë/ Konflikt për ujin, banorët heqin pengesën pranë burimit

Banorët e fshatit Dardhë Spathar, në njësinë administrative të Bashkisë Librazhd, kanë ngritur shqetësime serioze lidhur me aksesin në një burim uji që prej vitesh shërben për furnizimin e komunitetit lokal.

Sipas tyre, burimi ndodhet në një zonë pranë një objekti privat dhe kohët e fundit është rrethuar me gardh dhe tela, çka ka kufizuar ndjeshëm aksesin e lirë për banorët, si edhe ka vështirësuar ndërhyrjet për mirëmbajtjen e rrjetit të furnizimit me ujë.

Të përballur me mungesën e ujit prej disa javësh, banorët shprehen se situata është bërë e papërballueshme për jetën e përditshme. Ata kanë ndërmarrë sot veprime për të larguar pengesën e vendosur pranë burimit, duke argumentuar se ajo po pengonte drejtpërdrejt furnizimin normal me ujë të zonës.

Komuniteti lokal thekson se ky burim ka shërbyer për vite me radhë si një nga pikat kryesore të furnizimit me ujë dhe se çdo kufizim i aksesit prek menjëherë jetesën e banorëve.

Banorët i bëjnë thirrje institucioneve përgjegjëse të ndërhyjnë sa më shpejt për të sqaruar situatën dhe për të garantuar një zgjidhje të qëndrueshme, duke siguruar akses të rregullt dhe të sigurt në burimin e ujit.

Ata kërkojnë gjithashtu transparencë dhe zgjidhje afatgjatë, në mënyrë që problematika e furnizimit me ujë të mos vijojë të ndikojë në jetën e përditshme të komunitetit.

“KORÇA BOOM”