Fushata nis në gjashtë bashki, Presidenti firmos dekretin për zgjedhje të pjesshme

Presidenti i Republikës, Bajram Begaj, ka dekretuar ditën e diel, 9 nëntor 2025, si datën për zhvillimin e zgjedhjeve të pjesshme për kryetar bashkie në gjashtë bashki të vendit: Tiranë, Vlorë, Berat, Mat, Tepelenë dhe Cërrik.

Dekreti i Presidentit vjen pas njoftimit nga Këshilli i Ministrave, i cili ka konfirmuar vakancat përkatëse, përfshirë edhe kryeqytetin, ku posti është shpallur vakant pas shkarkimit të ish-kryetarit të bashkisë nga vetë Këshilli Bashkiak i Tiranës dhe më pas nga qeveria.

Në sqarimin e tij, Presidenti Begaj thekson se, në rastin e Tiranës, është ndjekur procedura ligjore që buron nga neni 115 i Kushtetutës, i cili parashikon shkarkimin e kryebashkiakut për mosparaqitje në detyrë për një periudhë 3-mujore të pandërprerë. Sipas Presidentit, ky rast nuk i nënshtrohet shqyrtimit nga Gjykata Kushtetuese, por nga juridiksioni gjyqësor administrativ.

Në këtë kontekst, Begaj thotë se nuk ka pasur ankimim të vendimit të qeverisë në Gjykatën Administrative dhe asnjë vendim pezullues nga ky institucion. Ai thekson se përderisa afati për dekretimin e zgjedhjeve është vetëm 48 orë pas marrjes së njoftimit për vakancën, ai ka vepruar në kohë dhe në përputhje me ligjin.

Presidenti shpreh pritshmërinë që zgjedhjet të jenë të ndershme, konkurruese dhe të zhvillohen në respekt të plotë të Kodit Zgjedhor. Ai u bën thirrje qytetarëve të këtyre bashkive të marrin pjesë masivisht në votime dhe të jenë pjesë aktive e jetës demokratike të vendit.

“KORÇA BOOM”