Gjermania nis hetim ndaj “Temu”: Dyshohet për manipulim dhe shkelje të konkurrencës

Gjermania nis hetim ndaj “Temu”: Dyshohet për manipulim dhe shkelje të konkurrencës

Zyra Federale e Kartelit në Gjermani ka hapur zyrtarisht një hetim ndaj platformës kineze të tregtisë elektronike Temu, duke e vendosur kompaninë nën vëzhgim për praktika të dyshimta të biznesit dhe manipulim të mundshëm të tregut.

Sipas njoftimit zyrtar, hetimi është përqendruar tek kushtet që Temu vendos për tregtarët dhe mënyra e trajtimit të furnitorëve, të cilët janë jetikë për funksionimin e platformës. Dyshohet se kompania mund të ketë imponuar çmime të padrejta, duke ndikuar në mënyrë të pandershme konkurrencën në tregun gjerman dhe evropian.

“Prej një viti, Temu është aktive në Gjermani dhe tashmë bashkëpunon edhe me furnitorë vendas. Po hetojmë nëse platforma po shfrytëzon pozicionin e saj në mënyrë të padrejtë, duke vendosur kushte që dëmtojnë konkurrencën dhe në fund konsumatorin,” u shpreh kreu i Autoritetit Gjerman të Konkurrencës.

Hetimi synon kompaninë mëmë të Temu për Evropën – Whaleco Technology Limited, e regjistruar në Dublin, Irlandë – një vend i njohur për politika tatimore lehtësuese për gjigantët e teknologjisë.

Temu, me rreth 19.3 milionë përdorues aktivë vetëm në Gjermani, ka pasur një rritje të jashtëzakonshme gjatë vitit 2024, duke zgjeruar praninë e saj në mbarë Evropën dhe SHBA. Ekspertët vlerësojnë të ardhurat vjetore mes 30 deri në 70 miliardë dollarë, që përfaqësojnë një rritje të shumëfishuar krahasuar me vitin 2023.

Kjo nuk është hera e parë që platforma përballet me akuza. Komisioni Evropian ka nisur një hetim të veçantë që nga korriku i këtij viti, ku Temu akuzohet se nuk ka marrë masa të mjaftueshme për të ndaluar shitjen e produkteve të paligjshme në faqen e saj.

“KORÇA BOOM”