Gjykata Kushtetuese pezullon zgjedhjet e 9 nëntorit në Tiranë pas ankimimit të Erion Veliajt

Në një vendim me jehonë të fortë politike dhe institucionale, Gjykata Kushtetuese ka vendosur pezullimin e dekretit të Presidentit të Republikës për mbajtjen e zgjedhjeve të parakohshme në Bashkinë e Tiranës, të planifikuara për datën 9 nëntor 2025. Kjo masë vjen në vijim të ankimimit të paraqitur nga ish-kryetari i bashkisë, Erion Veliaj, i cili kundërshton vendimin për shkarkimin e tij nga detyra.

Gjykata njoftoi se ka pranuar të shqyrtojë kërkesën e Veliajt dhe ka vendosur të kalojë çështjen në seancë plenare publike, e cila do të mbahet më datë 31 tetor 2025. Deri në atë moment, është pezulluar përkohësisht zbatimi i pjesës së dekretit presidencial që cakton datën e zgjedhjeve për kryetar të Bashkisë Tiranë.

Ky vendim është marrë në mënyrë unanime nga trupa gjyqësore e Gjykatës Kushtetuese dhe konsiderohet një hap i rëndësishëm në raportet mes pushtetit ekzekutiv dhe institucioneve të pavarura të drejtësisë në vend.

"KORÇA BOOM"