Hakmarrje apo drejtësi? Babai i Kristian Kolës thotë se nuk ka frikë nga askush

Një ngjarje e rëndë ka tronditur qytetin e Shkodrës pak ditë më parë, ku 34-vjeçari Kristian Kola u ekzekutua me breshëri plumbash. Shkaqet e këtij atentati mbeten ende mister, ndërsa policia vijon hetimet pa dhënë ende një përgjigje të qartë mbi motivet e vrasjes.

Mes dhimbjes së thellë, babai i viktimës, Marash Kola, ka rrëfyer në një intervistë për gazetaren Semiljana Azizi momentin kur mësoi lajmin tragjik. Ai tregoi se lajmin e mori përmes mediave të huaja dhe se djali i tij kishte dalë vetëm për të pirë një kafe me shokët, kur u qëllua në befasi nga atentatorët.

Marash Kola shprehet i indinjuar duke akuzuar autoritetet për mungesë përgjegjësie. Sipas tij, vrasjet me pagesë janë kthyer në një fenomen shqetësues në Shkodër, duke lënë të kuptohet se strukturat shtetërore u japin hapësirë autorëve për të kryer krime të tilla.

Ai përshkroi Kristianin si një djalë të qetë, punëtor dhe të dashur me njerëzit. I riu punonte në ndërtim dhe nuk kishte lidhje me aktivitete të paligjshme. Familja e tij nuk ka pasur konflikte, ndërsa Kristiani kishte një jetë modeste dhe ishte i lidhur me një vajzë me të cilën ishte ndarë më vonë me mirëkuptim.

Për Marash Kolën, një nga momentet më të rënda ishte fakti se djali qëndroi i plagosur për rreth një orë pa marrë ndihmën e duhur mjekësore, duke besuar se një reagim më i shpejtë i ambulancës mund t’i kishte shpëtuar jetën.

Mes dhimbjes dhe revoltës, babai i Kristianit ka deklaruar se nëse policia nuk arrin të zbardhë të vërtetën, ai mendon për hakmarrje. Sipas tij, nuk ka frikë nga askush dhe është i vendosur që drejtësinë ta marrë vetë, edhe nëse kjo e vë jetën e tij në rrezik.

“KORÇA BOOM”