Ilir Daja ndaj historisë, por shifra me “spec” para Dinamo-Skënderbeu

Skënderbeu dhe Dinamo do të përballen të dielën në Korçë, në një sfidë ku të dyja skuadrat kanë objektiva të rëndësishëm, por që vijnë me nevoja të ndryshme. Për blutë kryeqytetas kjo është një ndeshje ku synohet rikthimi te fitorja, pas rezultateve që nuk kanë qenë në nivelin e pritshmërive, ndërsa korçarët kërkojnë të marrin tri pikët për të konsoliduar pozitat e tyre dhe për të vijuar me qetësi rrugëtimin, veçanërisht në fushën e tyre.

Në krahun tjetër, kjo përballje sjell edhe një histori interesante në aspektin e pankinës. Ilir Daja, një emër që ka lënë gjurmë të rëndësishme në historinë e Skënderbeut, këtë herë nuk do të jetë në stol përballë ish-skuadrës së tij. Megjithatë, statistikat e trajnerit të Dinamos në përballjet ndaj korçarëve janë pozitive, duke e bërë edhe më interesante sfidën.

DAJA TE SKËNDERBEU – Ilir Daja ka një histori të veçantë me Skënderbeun, klub me të cilin arriti të shkruante një nga kapitujt e rëndësishëm të karrierës së tij si trajner. Sezoni 2017/18 mbetet një periudhë e paharrueshme për skuadrën korçare, me Dajën në drejtimin teknik. Nën drejtimin e tij, Skënderbeu fitoi titullin kampion të sezonit 2017/18, ndërsa arriti të triumfonte edhe në Kupën e Shqipërisë. Një sezon i jashtëzakonshëm për klubin, që u shoqërua edhe me pjesëmarrjen në fazën e grupeve të UEFA Europa League, duke e vendosur edhe një herë emrin e Skënderbeut në vëmendjen e futbollit europian. Këto suksese e bëjnë Ilir Dajën një nga figurat e rëndësishme të historisë së klubit korçar. Tashmë, ai rikthehet në Korçë në një rol tjetër, si trajner i Dinamos, me synimin për të marrë një rezultat pozitiv ndaj një skuadre me të cilën ka përjetuar momente të rëndësishme të karrierës së tij.

DAJA KUNDËR SKËNDERBEUT – Pavarësisht lidhjes së fortë me Skënderbeun, Ilir Daja ka ndërtuar edhe një bilanc të rëndësishëm në përballjet si kundërshtar i skuadrës korçare. Në 22 ndeshje të zhvilluara ndaj Skënderbeut, skuadrat e drejtuara prej tij kanë regjistruar 8 fitore, 5 barazime dhe 9 humbje. Në këto takime, bilanci i golave është 27 të shënuar dhe 26 të pësuar, ndërsa Daja ka grumbulluar 29 pikë, me një mesatare prej 1.32 pikësh për ndeshje.

Shifrat tregojnë se përballjet me Skënderbeun nuk kanë qenë të lehta për trajnerin e Dinamos, por ai ka ditur të marrë edhe rezultate pozitive përballë ish-klubit të tij. Një statistikë që i jep një tjetër dimension sfidës së së dielës, ku Dinamo kërkon të rikthehet te fitorja, ndërsa Skënderbeu synon të mbrojë fort terrenin e vet. Këtë herë, vlen të theksohet fakti se Ilir Daja do të duhet ta ndjekë 90 minutëshin nga tribuna duke qenë se është i pezulluar, megjithatë kjo nuk e ndalon që të përgatisë skuadrën deri në detaje për sfidën e radhës.

DAJA KUNDËR AHMATAJT – Një tjetër element interesant i kësaj përballjeje është edhe historia e përballjeve mes Ilir Dajës dhe Julian Ahmatajt, trajnerit aktual të Skënderbeut. Sipas statistikave të disponueshme, Daja ka regjistruar 7 fitore, 5 barazime dhe asnjë humbje në përballjet ndaj Ahmatajt, me një mesatare prej 2.43 pikësh për ndeshje.

Kështu, përballja e së dielës në Korçë nuk është thjesht një duel mes dy skuadrave me objektiva të rëndësishëm, por edhe një sfidë që mbart histori të veçanta mes dy trajnerëve. Daja ka një të kaluar të lavdishme me Skënderbeun dhe një bilanc të njohur ndaj korçarëve, e njëkohësisht edhe ndaj trajnerit të Skënderbeut./ PANORAMASPORT.AL

“KORÇA BOOM”