Incident i rëndë pas Sopoti–Besëlidhja, ndërhyn policia

Ndeshja e Kategorisë së Dytë, Grupi A, mes Sopotit të Librazhdit dhe Besëlidhjes, e zhvilluar në stadiumin e qytetit, u shndërrua nga një përballje e fortë sportive në një incident të rëndë jashtë fushës.

Mbi 3 mijë tifozë kishin mbushur shkallët e stadiumit, duke krijuar një atmosferë elektrizuese që ndikoi ndjeshëm në ritmin dhe tensionin e takimit. Ndeshja u karakterizua nga një intensitet i lartë dhe shumë ndërhyrje të forta, çka solli edhe ndëshkime të shumta me kartonë të verdhë.

Sopoti mbeti me 10 lojtarë që në minutat e para të pjesës së parë, pas ndëshkimit me karton të kuq të një prej futbollistëve të tij. Megjithatë, edhe me inferioritet numerik, vendasit treguan karakter, ndërsa takimi prodhoi dy gola spektakolarë, nga një për secilën skuadër, duke e kthyer përballjen në një nga më të komentuarat e javës.

Incidentet pas ndeshjes

Tensioni nuk përfundoi me vërshëllimën finale. Në përfundim të takimit, teksa futbollistët e Besëlidhjes po i drejtoheshin dhomave të zhveshjes, u regjistruan përplasje me punonjës të Policisë Bashkiake.

Sipas informacioneve paraprake, një prej punonjësve të policisë është goditur me grusht, në rrethana ende të paqarta. Reagimi i tifozëve shtoi më tej tensionin, por ndërhyrja e menjëhershme e forcave të rendit shmangu përshkallëzimin e situatës.

Të paktën tre persona janë shoqëruar në Komisariatin e Policisë së Librazhdit për sqarimin e plotë të ngjarjes, ndërsa pritet një reagim zyrtar nga autoritetet dhe strukturat përkatëse të futbollit.

"KORCA BOOM"