Kaos në rrugë: Fermerët zhvendosin automjetet e policisë dhe bllokojnë autostradën

Fermerët në Greqi kanë dalë masivisht në rrugë, duke paralizuar Autostradën Kombëtare Athinë–Selanik, dhe kanë paralajmëruar se nuk do të bëjnë asnjë hap pas, pas ndërhyrjes së dhunshme të policisë një ditë më parë. Përdorimi i kimikateve dhe shkopinjve nga autoritetet shkaktoi tensione të forta, por fermerët nuk janë të gatshëm të tërhiqen.

Në zonën e Platikambos të Larisës, përleshjet mes fermerëve dhe policisë u përshkallëzuan, ku tre persona u arrestuan. Fermeri Christos Sideropoulos u dërgua në spital pasi humbi ndjenjat për shkak të ekspozimit ndaj kimikateve. Të tre të arrestuarit do të dalin para prokurorit në Gjykatën e Larisës, ndërsa kolegët e tyre kërkojnë lirimin e menjëhershëm.

Raportimet nga terreni flasin për dhunë të tepruar nga policia. Fermerët tentuan të largonin një makinë patrullimi që bllokonte kalimin, ndërsa një oficer policie u përpoq të ndalonte përparimin e një traktori vetëm me trupin e tij. Megjithatë, fermerët arritën të zhvendosnin automjetet e policisë dhe t’i bashkoheshin bllokadës së madhe në Nikea, duke ndaluar trafikun në një nga rrugët kryesore të vendit.

Pavarësisht përdorimit të kimikateve, arrestimeve dhe të plagosurve, fermerët mbeten të vendosur në protestat e tyre, duke kërkuar zgjidhje për kërkesat e tyre dhe lirimin e kolegëve të arrestuar. Situata mbetet e tensionuar dhe autoritetet paralajmërojnë për mundësinë e ndërhyrjeve të tjera, ndërsa qytetarët përballen me pengesa të mëdha në trafikun kombëtar.

"KORCA BOOM"