Kapet në flagrancë, përfundon duke sulmuar policinë në komisariat

Një ngjarje e pazakontë është regjistruar në kryeqytet, ku një 32-vjeçar ka përfunduar në pranga pas një incidenti me efektivët e Policisë së Shtetit.

Sipas informacioneve zyrtare, i riu është konstatuar në flagrancë duke hedhur lëndë piroteknike (fishekzjarre) në një zonë publike, çka ka sjellë ndërhyrjen e menjëhershme të forcave të rendit për të parandaluar rrezikimin e qytetarëve.

Gjatë ndërhyrjes, 32-vjeçari fillimisht ka kundërshtuar veprimet e policisë dhe më pas ka reaguar në mënyrë agresive gjatë shoqërimit në komisariat, duke goditur efektivët e policisë.

Menjëherë pas ngjarjes, ai është arrestuar nga specialistët për Hetimin e Krimeve në Komisariatin e Policisë Nr. 6.

“Specialistët për Hetimin e Krimeve të Komisariatit të Policisë Nr. 6 arrestuan shtetasin A. M., 32 vjeç, pasi u kap duke hedhur lëndë piroteknike. Më tej, gjatë shoqërimit në ambientet e Policisë, 32-vjeçari ka goditur efektivët”, thuhet në njoftimin zyrtar të policisë.

Hetimet lidhur me rrethanat e plota të ngjarjes vijojnë.

“KORÇA BOOM”