Kapshticë – Arrestohet në flagrancë 48-vjeçari që tentoi të fuste mallra kontrabandë në Shqipëri

Shërbimet e Drejtorisë Vendore për Kufirin dhe Migracionin Korçë kanë intensifikuar kontrollet në kufirin jeshil dhe në pikat e kalimit kufitar, me synim parandalimin dhe goditjen e paligjshmërisë.

Si rezultat i këtyre kontrolleve, në Pikën e Kalimit Kufitar Kapshticë, shërbimet e Policisë Kufitare ndaluan për kontroll të detajuar një automjet që drejtohej nga shtetasi S. L., 48 vjeç, banues në fshatin Plug, Lushnjë.

Gjatë kontrollit, në automjet u gjetën të fshehura 32 steka me cigare dhe disa produkte ushqimore, të cilat dyshohet se shtetasi në fjalë po tentonte t’i fuste në territorin shqiptar në mënyrë të paligjshme, pa i deklaruar sipas procedurës ligjore.

Në përfundim të veprimeve procedurale, specialistët për Hetimin e Krimeve në Drejtorinë Vendore për Kufirin dhe Migracionin Korçë arrestuan në flagrancë shtetasin S. L., për veprën penale “Kontrabanda me mallra që paguajnë akcizë”.

Mallrat e kapura u sekuestruan në cilësinë e provës materiale.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.

“KORÇA BOOM”