Korçë dhe Pogradec, sekuestrohen monopatina elektrike, nis zbatimi i vendimit për ndalimin e qarkullimit

Vendimi për ndalimin e përkohshëm të qarkullimit të monopatinave elektrike ka hyrë në fuqi edhe në qarkun e Korçës. Gjatë kontrolleve të intensifikuara të Policisë Rrugore, janë sekuestruar tre monopatina në qytetin e Korçës dhe në Pogradec, pasi u konstatuan në shkelje të rregullave të qarkullimit.

Sipas Drejtorisë Vendore të Policisë Korçë, sekuestrimet janë bërë gjatë verifikimeve në rrugët urbane, në zbatim të masave të reja që synojnë rritjen e sigurisë rrugore dhe parandalimin e aksidenteve.

Ky vendim është marrë nga Policia e Shtetit në bashkëpunim me Ministrinë e Brendshme, pas një rritjeje të ndjeshme të numrit të aksidenteve të shkaktuara nga përdorimi i monopatinave elektrike në hapësirat publike.

Ndalimi i përkohshëm, deri në një ligj të posaçëm

Autoritetet bëjnë me dije se ndalimi i përdorimit të këtyre mjeteve do të qëndrojë në fuqi deri në miratimin e një kuadri ligjor të posaçëm, që do të rregullojë:

• përdorimin e kaskave mbrojtëse

• vendosjen e sinjalistikës përkatëse

• kufizimin e moshës për përdoruesit

• si dhe kushte të tjera teknike e të sigurisë për qarkullimin në rrugë

  
  

Kjo masë vjen si reagim ndaj shqetësimeve të shprehura nga qytetarët dhe statistikave të aksidenteve, ku monopatinat elektrike janë përfshirë si mjete që qarkullojnë pa asnjë kontroll apo rregull.

“KORÇA BOOM”