LAJMI I FUNDIT / Skënderbeu afron talentin e Shkupit për UEFA Youth League

Klubi i Skënderbeut ka bërë një goditje të rëndësishme për të ardhmen, duke afruar në radhët e veta Gazment Lamallarin, një nga talentet më premtuese të akademisë së FC Shkupit. Futbollisti i ri është prezantuar zyrtarisht si lojtar i bardhekuqve dhe pritet të jetë një vlerë e shtuar për projektin e klubit.

Lamallari do të jetë fillimisht pjesë e ekipit U-19, i cili si kampion në fuqi i Shqipërisë, do të përfaqësojë vendin në edicionin e ardhshëm të UEFA Youth League – një skenë prestigjioze për futbollistët e rinj.

Përveç angazhimit me të rinjtë, mesfushori do të jetë nën vëzhgim të vazhdueshëm nga stafi i ekipit të parë, duke qenë pjesë e planit të integrimit të talenteve në formacionin e madh.

Sezonin e kaluar me FC Shkupin U-19, Lamallari regjistroi një sezon të shkëlqyer, duke fituar dy trofe: kampionatin dhe Kupën e të rinjve në Maqedoninë e Veriut.

Skënderbeu vazhdon kështu të investojë te lojtarët e rinj me potencial, duke ndërtuar një bazë të fortë për të ardhmen.

“KORÇA BOOM”