LAJMI I FUNDIT/ Gjendet trupi i pajetë i 75-vjeçares Flora Hoxha pas 24 orësh kërkime

Burime pranë policisë lokale bëjnë të ditur se 75-vjeçarja Flora Hoxha është gjetur e mbytur pranë lumit Devoll. Sipas informacioneve paraprake, e moshuara, e cila vuante nga probleme të shëndetit mendor, është larguar nga banesa rreth orës 05:00 të mëngjesit të djeshëm dhe nuk është rikthyer më.

Dyshohet se ajo është rrëmbyer nga ujërat e kanalit kryesor të fshatit, i cili prej tre ditësh kishte qenë plotësisht i mbuluar me ujë për shkak të prurjeve të larta.

Menjëherë pas njoftimit për humbjen e saj, forcat e policisë, zjarrfikësit dhe ekipet e emergjencave civile u angazhuan në një operacion kërkimi përgjatë zonës. Pas kërkimeve intensive që zgjatën gjatë gjithë ditës së djeshme dhe natës, vetëm mëngjesin e sotëm u bë e mundur gjetja e trupit të saj.

Fatkeqësisht, e moshuara u gjet pa shenja jete, duke i dhënë fund me tragjedi kërkimeve që kishin mbërthyer në ankth familjarët dhe komunitetin lokal.

NJOFTIMI I POLICISË:

Devoll / Në vijim të informacionit të dhënë mbrëmjen e djeshme, për shtetasen F. H., 75 vjeçe, e cila ishte larguar nga banesa dhe dyshohej se mund të ishte mbytur për shkak të prezencës së ujit në fshatin Progër, pas kontrolleve të kryera, sot rreth orës 08:30, kjo shtetase është gjetur në dalje të fshatit, në anë të një përroi, pa shenja jete.

Grupi hetimor ndodhet në vendngjarje dhe po kryen veprimet hetimore.

“KORÇA BOOM”