Marjana Bacellari zgjidhet Drejtoresha e re e Zyrës Vendore të Arsimit Parauniversitar Korçë–Pustec

Marjana Bacellari është emëruar Drejtoresha e re e Zyrës Vendore të Arsimit Parauniversitar Korçë–Pustec, duke sjellë me vete një përvojë të gjatë profesionale në menaxhimin e projekteve, zhvillimin e komunitetit dhe politikat arsimore.

Me mbi një dekadë angazhim në programe që synojnë përmirësimin e cilësisë së arsimit dhe mirëqenies së fëmijëve dhe të rinjve, Bacellari ka ndërtuar një profil të konsoliduar në drejtimin dhe koordinimin e iniciativave zhvillimore në bashkëpunim me institucione publike, organizata të shoqërisë civile dhe partnerë ndërkombëtarë.

E diplomuar në Financë dhe Kontabilitet, ajo ka mbajtur role të rëndësishme drejtuese dhe koordinuese në projekte që lidhen me arsimin gjithëpërfshirës, mbrojtjen e fëmijëve dhe fuqizimin e komuniteteve lokale.

Për më shumë se një dekadë, Bacellari ka kontribuar në organizatën World Vision Albania, ku ka drejtuar programe arsimore dhe projekte për zhvillimin e komunitetit. Në këtë rol, ajo ka bashkëpunuar ngushtë me shkollat, institucionet dhe aktorët lokalë për të promovuar arsimin cilësor dhe përfshirjen sociale.

Më pas, ajo ka shërbyer si koordinatore projektesh në iniciativa të rëndësishme për reformimin e sistemit të mirëqenies së fëmijëve në Shqipëri, si dhe si specialiste për koordinimin e projekteve të Bashkimit Europian pranë Bashkisë Korçë.

Përvoja e saj përfshin drejtimin e ekipeve, menaxhimin strategjik të projekteve, ndërtimin e partneriteteve ndërinstitucionale dhe organizimin e proceseve që nxisin bashkëpunimin mes institucioneve, komunitetit dhe sektorit civil.

Me një vizion të qartë për zhvillimin e arsimit dhe një angazhim të fortë për shërbimin publik, Marjana Bacellari synon të kontribuojë në forcimin e institucioneve arsimore dhe në krijimin e mundësive më të mira për edukimin dhe formimin e brezave të rinj.

“KORÇA BOOM”