Mashtrimi me bukën në Shqipëri: “Mos i blini pas orës 17:00”/ Shitësja zbulon arsyen

Një dëshmi shqetësuese ka tronditur opinionin publik shqiptar, duke hedhur dritë mbi një praktikë të përhapur, por të panjohur për shumë konsumatorë në furrat e bukës. Një shitëse anonime, e cila punon në një furrë buke, ka denoncuar në rrjetet sociale rishitjen e bukës jo të freskët si të sapodalë nga furra. Ky zbulim ka ngjallur debat mbi cilësinë, ndershmërinë dhe të drejtën e konsumatorit për të ditur se çfarë ble.

Sipas dëshmisë së shitëses, buka që prodhohet në orët e para të mëngjesit dhe që nuk arrin të shitet gjatë ditës, nuk hidhet dhe as nuk çregjistrohet si mbetje. Përkundrazi, ajo shpesh rikthehet në shitje gjatë pasdites, me trukun e thjeshtë të “ringrohjes”.

“Ka raste kur buka që nuk është shitur në mëngjes, nuk hidhet. Thjesht ngrohet pak dhe vendoset sërish në rafte, shpeshherë në të njëjtat qese që ka qenë më parë. Ndodh më shumë kur lëvizja është e ulët,” – shkruan ajo, duke zbuluar mashtrimin.

Në pamje të parë, buka që nxirret nga rafti pas orës 17:00 duket e sapodalë nga furra, e ngrohtë, me avull dhe një erë që ngatërrohet lehtësisht me atë të produktit të freskët. Por në realitet, ajo mund të jetë bukë që ka kaluar orë të tëra në raft ose, në disa raste, ka mbetur stok që prej ditës së djeshme.

“E ngrohin pak në furrë ose e vendosin në frigoriferët e kthyer në modalitet të ngrohjes për të nxjerrë avull. Klienti mendon se është evsapo dalë nga furra, por në fakt është bukë që ka kaluar qarkullimin normal të ditës,” – vazhdon dëshmia.

Edhe pse kjo praktikë nuk përbën rrezik të drejtpërdrejtë për shëndetin, ngritja e shqetësimit vjen në raport me cilësinë, ndershmërinë dhe të drejtën e konsumatorit për të ditur se çfarë blen. Për një produkt bazë si buka – që konsumohet çdo ditë në çdo familje shqiptare – pritshmëria për freski dhe cilësi është minimale, por thelbësore.

“Nuk ka ndonjë rrezik për konsum, por është çështje morali. Njerëzit blejnë bukë të ngrohtë sepse mendojnë se është e freskët. Ata nuk e dinë se është ringrohur për të mos u hedhur,” – thekson shitësja.

Komentet pas postimit tregojnë se ky fenomen nuk është i izoluar. Disa përdorues të rrjeteve sociale kanë pranuar se kanë pasur dyshime të ngjashme, sidomos në ditë me reshje apo në fundjavë, kur lëvizshmëria është më e ulët dhe raftet e bukës pasdite mbushen “çuditërisht” me bukë të ngrohtë.

Ndërkohë që mungojnë kontrollet e mirëfillta për këtë lloj manipulimi, ekspertë të sigurisë ushqimore sugjerojnë që klientët të kontrollojnë lagështinë e bukës, elasticitetin dhe korejën – sepse këto janë disa nga shenjat që dallojnë një bukë të sapo pjekur nga ajo e ringrohur. Kodi ushqimor shqiptar kërkon etiketim të saktë dhe informim të drejtë të konsumatorit, por në produktet e furrës, ku etiketimi zakonisht mungon, përgjegjësia bie mbi ndërgjegjen e subjektit.

Ky denoncim i sinqertë i një shitëseje ka hapur një debat të heshtur mbi transparencën në industrinë e bukës në Shqipëri. Pavarësisht mungesës së rrezikut të drejtpërdrejtë, njerëzit kanë të drejtë të dinë nëse buka që po blejnë është vërtet e freskët, apo thjesht e ringrohur me kujdes për të ruajtur imazhin e freskisë. Në një treg ku konsumatori nuk është gjithmonë i mbrojtur, ky zë i sinqertë vlen si një kujtesë për të kërkuar më shumë ndershmëri, cilësi dhe respekt në produktet që konsumojmë çdo ditë.

“KORÇA BOOM”