Ndryshime në hierarkinë e arbitrave shqiptarë: Komiteti i Arbitrimit prezanton sistem të ri për sezonin 2025-2026

Federata Shqiptare e Futbollit ka miratuar një sërë ndryshimesh të rëndësishme në sistemin e arbitrimit për sezonin e ardhshëm futbollistik 2025-2026. Vendimet u morën në vijim të mbledhjes së Komitetit Ekzekutiv, ndërsa Komiteti i Arbitrimit, në bashkëpunim me Sektorin e Arbitrimit, ka propozuar një ristrukturim të plotë të emërtimeve dhe përbërjes së kategorive të arbitrave dhe zyrtarëve të ndeshjeve.

Ndryshimi më i dukshëm ka të bëjë me emërtimin e kategorive, duke i përshtatur ato me një strukturë më të standardizuar dhe të lehtë për t’u ndjekur:

Kategoria e Parë (më parë e quajtur “Superiore”)

Kategoria e Dytë (ish “Kategoria e Parë”)

Kategoria e Tretë (ish “Kategoria e Dytë”)

Kategoria Amatore (ish “Kategoria e Tretë”)

Ky riformatim synon të krijojë një shkallëzim më të qartë të nivelit të arbitrave dhe vëzhguesve, duke përmirësuar organizimin dhe kontrollin e ndeshjeve në të gjitha nivelet e garës.

Përbërja e kategorive për sezonin 2025-2026 është si më poshtë:

Kategoria e Parë: 30 arbitra dhe 40 asistentë

Kategoria e Dytë: 20 arbitra dhe 40 asistentë

Kategoria e Tretë: 25 arbitra dhe 30 asistentë

Kategoria Amatore: 30 arbitra

Sipas njoftimit zyrtar, kjo strukturë e re është pjesë e strategjisë së zhvillimit të arbitrimit në vend, duke marrë parasysh rritjen e nivelit të konkurrencës në kampionatet kryesore si Abissnet Superiore dhe Kategoria e Parë.

Gjithashtu, ndryshimet synojnë të ofrojnë më shumë mundësi për përgatitje, ngritje profesionale dhe vlerësim të drejtë për gjyqtarët në bazë të performancës dhe nivelit të përfshirjes.

Pritet që ky sistem i ri të sjellë më shumë efikasitet në ndarjen e drejtësisë sportive dhe të rrisë cilësinë e arbitrimit në futbollin shqiptar.

“KORÇA BOOM”