Ndryshime të mëdha në sezonin e ri të Superligës Shqiptare

Sezoni i ri i Superligës Shqiptare do të nisë me disa ndryshime të rëndësishme në formatin e kompeticionit. Krahas sistemit "Final 4", i cili është paralajmëruar më herët, është planifikuar edhe një përgjysmim i pikëve në një fazë të caktuar të sezonit, një risi që sjell një tjetër dimension garues në kampionat.

Sipas formatit të ri që u është prezantuar 10 skuadrave pjesëmarrëse, ekipet do të përballen tri herë me njëra-tjetrën gjatë sezonit. Ky model është i ngjashëm me atë që është përdorur më parë në Kategorinë e Parë dhe synon të rrisë intensitetin dhe rivalitetin në ndeshjet e fazës së dytë të kampionatit.

Përgjysmimi i pikëve do të hyjë në fuqi para nisjes së fazës "Final 4", duke u dhënë më shumë skuadrave mundësinë për të luftuar për objektivat sezonalë, qofshin ato titulli kampion apo kualifikimi në garat ndërkombëtare.

Ky ndryshim i rëndësishëm në format pritet të sjellë më shumë emocione dhe konkurrencë deri në fund të sezonit. Detaje të tjera në lidhje me këtë skemë priten të bëhen publike në ditët në vijim, ndërsa klubet kanë nisur tashmë përgatitjet për t’u përshtatur me sistemin e ri të lojës.

“KORÇA BOOM”