Ndryshon sigurimi i makinave, dëmshpërblimi deri në 250 mijë lekë brenda 14 ditëve!
Një projektligj i ri për sigurimin e detyrueshëm të automjeteve parashikon ndryshime të rëndësishme për drejtuesit e mjeteve dhe qytetarët që përfshihen në aksidente rrugore.
Nisma synon zgjerimin e mbrojtjes për të dëmtuarit, rritjen e kufijve të kompensimit dhe shkurtimin e afateve për marrjen e dëmshpërblimit.
Sipas ndryshimeve të propozuara, sigurimi i detyrueshëm do të mbulojë në mënyrë të shprehur jo vetëm këmbësorët dhe personat jashtë automjetit, por edhe pasagjerët dhe përdoruesit e tjerë të rrugës.
Një nga ndryshimet kryesore lidhet me dëmet e vogla materiale. Kufiri për procedurën e përshpejtuar të dëmshpërblimit parashikohet të rritet nga 100 mijë në 250 mijë lekë. Gjithashtu, kompanitë e sigurimit do të detyrohen të kryejnë pagesën brenda 14 ditëve nga paraqitja e kërkesës.
Projektligji sjell lehtësi edhe për qytetarët që duan të ndryshojnë kompaninë e sigurimit. Ata do të kenë të drejtë të marrin pa pagesë një dokument që përmban historikun e dëmeve për pesë vitet e fundit. Ky dokument do të përdoret për përcaktimin e primit të sigurimit dhe do të lehtësojë transferimin te një kompani tjetër.
Një tjetër parashikim i ri është periudha 15-ditore pas përfundimit të kontratës së sigurimit, gjatë së cilës do të garantohet vijimësia e mbulimit, sipas kushteve të përcaktuara në ligj.
Ndryshime parashikohen edhe për aksidentet ku automjeti shkaktar është i pasiguruar ose nuk arrin të identifikohet. Në këto raste synohet forcimi i mekanizmave të kompensimit përmes Fondit të Kompensimit.
Projektligji synon të përmirësojë mbrojtjen e qytetarëve dhe të bëjë më të shpejta procedurat e dëmshpërblimit. Megjithatë, bëhet fjalë për ndryshime të propozuara, të cilat duhet të ndjekin procedurat për miratimin dhe hyrjen në fuqi.
“KORÇA BOOM”
















