Nga mbrojtje mjedisi në kosto të larta, karikimi i makinave elektrike bëhet më i shtrenjtë

Pas ankesave të vazhdueshme për çmimet e larta të karburanteve, një tjetër rritje çmimi prek këtë herë drejtuesit e automjeteve elektrike. Enti Rregullator i Energjisë (ERE) ka miratuar një tarifë të re për energjinë elektrike të përdorur në stacionet publike të karikimit, e cila do të hyjë në fuqi më 1 nëntor.

Sipas vendimit të ERE-s, çmimi i karikimit do të jetë:

• 22 lekë për kWh gjatë orarit normal

• 25.3 lekë për kWh në orarin e pikut, nga ora 18:00 deri në 23:00

ERE argumenton se kjo rritje është e nevojshme për shkak të ndikimit që stacionet e karikimit kanë në rritjen e konsumit të përgjithshëm të energjisë. Sipas institucionit, kërkesa në rritje për karikim po krijon kosto shtesë për balancimin dhe stabilitetin e rrjetit elektrik.

Tarifat e reja do të aplikohen menjëherë në çmimet që paguajnë përdoruesit në pikat publike të karikimit dhe pritet të kenë ndikim të drejtpërdrejtë në koston e përdorimit të mjeteve elektrike në vend.

Ky vendim vjen në një kohë kur qeveria ka promovuar përdorimin e automjeteve elektrike si pjesë e politikave për një mjedis më të pastër dhe reduktimin e ndotjes urbane. Megjithatë, tarifimi i ri mund të ngadalësojë ritmin e përhapjes së këtyre mjeteve, veçanërisht në kushtet e krizës energjetike dhe kostove në rritje për qytetarët.

“KORÇA BOOM”