Nga politika në institucionin e Presidentit: Ferdinand Xhaferaj merr detyrën e re

Ish-deputeti i Partisë Demokratike në Durrës, Ferdinand Xhaferaj, është emëruar këshilltar i Presidentit të Republikës, Bajram Begaj. Emërimi është bërë gjatë ditëve të fundit, pas përfundimit të mandatit të tij në Kuvendin e Shqipërisë.

Xhaferaj nuk mori pjesë në primaret e PD-së dhe vendosi të mos rikandidonte në zgjedhjet e ardhshme parlamentare, duke përmbyllur një kapitull të gjatë në jetën parlamentare.

Ferdinand Xhaferaj ka një karrierë të gjatë dhe të konsoliduar si në politikë, ashtu edhe në fushën e sigurisë kombëtare dhe akademisë. Ai është diplomuar në Universitetin e Tiranës dhe në vitin 1999 ndoqi një specializim në Universitetin e Harvardit për “Politikat e Lidershipit”. Më tej, ai përfundoi një Master të Dyfishtë për “Siguri Ndërkombëtare” dhe “Çështje të Sigurisë Kombëtare” në Naval Postgraduate School në SHBA. Në vitin 2006, mbylli studimet e doktoraturës pranë Akademisë së Mbrojtjes.

Në arenën politike, Xhaferaj ka qenë deputet i Partisë Demokratike për pesë legjislatura dhe ka mbajtur funksione të rëndësishme parlamentare dhe qeveritare. Ndër to përfshihen: kryetar i delegacionit shqiptar në Asamblenë Parlamentare të NATO-s (1996–1997), bashkëkryetar i Komisionit për Integrimin në NATO (2007–2009), zëvendëskryetar i Komisionit për Integrim Europian (2005–2009), anëtar i delegacionit shqiptar në Parlamentin Europian (2005–2009), si dhe zëvendëskryetar i Komisionit të Sigurisë Kombëtare (2021–2025).

Në periudhën 2009–2011 ka shërbyer si Ministër i Turizmit, Kulturës, Rinisë dhe Sporteve, ku është vlerësuar për promovimin e turizmit dhe trashëgimisë kulturore shqiptare.

Përveç veprimtarisë politike, Xhaferaj ka një prani të rëndësishme në fushën akademike. Ai ka ligjëruar në Akademinë Ushtarake, Universitetin e Durrësit dhe Kolegjin Universitar “Bedër”. Është autor i monografisë “Deballkanizmi i Ballkanit”, botuar nga shtëpia botuese “Dudaj”, si dhe pjesëmarrës në një sërë konferencash kombëtare e ndërkombëtare mbi sigurinë kombëtare dhe marrëdhëniet ndërkombëtare.

Xhaferaj zotëron gjuhët angleze dhe italiane dhe njihet për ekspertizën e tij në fushat e shkencave politike, sigurisë kombëtare dhe marrëdhënieve ndërkombëtare.

“KORÇA BOOM”