Në vend të tij flet mbrojtja, ja kë ka zgjedhur Erion Veliaj si avokat

Në Gjykatën e Posaçme Kundër Korrupsionit dhe Krimit të Organizuar (GJKKO) ka nisur seanca e radhës në themel për gjykimin e kryebashkiakut të Tiranës, Erion Veliaj, bashkëshortes së tij Ajola Xoxa dhe të pandehurve të tjerë.

Në këtë seancë, SPAK përfaqësohet nga dy prokurorët e posaçëm Altin Dumani dhe Ols Dado.

Ndryshe nga sa pritej, Veliaj nuk është paraqitur personalisht në seancë. Në vend të tij, ai ka depozituar një deklaratë përmes së cilës kërkon të përfaqësohet nga avokati Plarent Ndreca, ish-deputet i Partisë Socialiste, i cili ishte i pranishëm në sallë në rolin e mbrojtësit ligjor.

Përveç Ndrecës, në seancë ishte e pranishme edhe avokatja kryesore e Veliajt, Valentina Todoresku, e cila ndjek prej kohësh çështjen.

Seanca është zhvilluar në kuadër të procesit gjyqësor në themel, ndërsa pritet që në vijim të ketë diskutime mbi provat dhe qëndrimet e palëve.

Mungesa e Veliajt në sallë dhe përfaqësimi i tij përmes avokatëve është një zhvillim që ka tërhequr vëmendje, ndërsa procesi ndaj tij dhe të pandehurve të tjerë vijon të ndiqet me interes të lartë publik.

“KORÇA BOOM”