top of page

E DYSHIMTË/ Volkswagen-i përfundon në kanal gjatë natës, shoferi dyshohet se braktisi makinën

42 minutes ago
1 min read

Një automjet tip Volkswagen është gjetur mëngjesin e sotëm brenda një kanali në fshatin Kallm të Fierit. Zbulimi është bërë nga banorët e zonës, të cilët kanë konstatuar makinën të dalë nga rruga dhe të përfunduar në kanal, duke njoftuar menjëherë shërbimet përkatëse.


Dyshohet se automjeti ka dalë nga rruga gjatë orëve të natës ose në orët e para të mëngjesit, ndërsa rrethanat e aksidentit mbeten ende të paqarta. Nuk dihet ende se si ka ndodhur ngjarja dhe nëse drejtuesi i mjetit ka humbur kontrollin për shkak të shpejtësisë, apo për ndonjë arsye tjetër.


Pas marrjes së njoftimit, në vendngjarje kanë mbërritur forcat zjarrfikëse, shërbimet e Policisë dhe ambulanca, për të verifikuar situatën dhe për të parë nëse kishte persona të bllokuar brenda automjetit.


Nga verifikimet paraprake nuk rezulton të ketë persona në kabinën e makinës. Kjo ka ngritur dyshimet se drejtuesi i automjetit mund të jetë larguar nga vendi i ngjarjes pas aksidentit, duke e lënë mjetin brenda kanalit.


Ndërkohë, pritet që verifikimet e Policisë të hedhin dritë mbi identitetin e personit që drejtonte automjetin, si dhe mbi rrethanat në të cilat ndodhi aksidenti. Autoritetet po punojnë për të sqaruar nëse në makinë ka pasur persona të tjerë në momentin kur ajo doli nga rruga.


Për momentin, nuk ka të dhëna zyrtare për persona të lënduar apo për shkaqet e aksidentit./ Lajmi i fundit

“KORÇA BOOM”


bottom of page