"Paqe tek ju”, mesazhi i Pashkës i Kryepiskopit Joani: Besimi si udhë në kohë pasigurie

Kryepiskopi i Kishës Orthodokse Autoqefale të Shqipërisë, Joani, ka përcjellë mesazhin e tij të Pashkës për besimtarët, duke vënë theksin te rëndësia e paqes dhe forcës së besimit në një periudhë të trazuar për botën.

Në fjalën e tij, ai rikujton përshëndetjen e parë të Krishtit pas Ngjalljes, “Paqe në ju”, duke e cilësuar atë si një thirrje të përhershme që mbetet aktuale edhe në realitetin e sotëm, të shoqëruar me konflikte, pasiguri dhe ankth për të ardhmen.

Sipas Kryepiskopit, paqja e vërtetë nuk varet nga rrethanat e jashtme, por buron nga brendësia e njeriut dhe nga marrëdhënia e tij me Zotin. Ai thekson se falja dhe dashuria janë çelësi për të thyer ciklin e urrejtjes dhe për të ndërtuar një shoqëri më të qetë dhe më të drejtë.

Në mesazhin e tij, Joani ndalet edhe te sfidat e shoqërisë moderne, ku ndjekja e të mirave materiale shpesh nuk sjell qetësi shpirtërore, por boshllëk dhe pasiguri. Sipas tij, zgjidhja qëndron në rikthimin te besimi dhe te vlerat e qëndrueshme shpirtërore.

Ai kujton gjithashtu historinë e vështirë të Kishës Orthodokse në Shqipëri, e cila, pavarësisht sfidave, ka arritur të ringrihet, duke e lidhur këtë me mesazhin e shpresës dhe të jetës së re që sjell Ngjallja.

Në përmbyllje, Kryepiskopi bën thirrje për më shumë paqe, mirëkuptim dhe solidaritet, duke i ftuar besimtarët që ta reflektojnë këtë frymë në jetën e përditshme dhe në marrëdhëniet me njëri-tjetrin.

"KORÇA BOOM"