Penallti e mohuar? Skënderbeu largohet me një pikë nga Peshkopia

Skënderbeu ishte mysafir në Peshkopi, ku u nda me nga një pikë me ekipin e Korabit në një barazim që u ndikua nga disa faktorë. Në mënyrë të veçantë, terreni i rënduar e bëri të vështirë zhvillimin normal të lojës dhe ndikoi dukshëm në cilësinë e aksioneve.

Pjesa e parë u karakterizua në përgjithësi nga raste më të pastra për Skënderbeun, i cili iu afrua disa herë golit me anë të Vangjelit, Gjinit dhe Gjumsi. Megjithatë, forma e mirë e portierit vendas bëri që rrjeta të mbetej e paprekur, duke ruajtur ekuilibrin e rezultatit.

Në pjesën e dytë, sidomos pas aktivizimit të Nasrit, loja foli më shumë për Skënderbeun.

Korçarët shtuan presionin dhe kontrolluan ritmin e ndeshjes, duke krijuar disa raste të rrezikshme, veçanërisht në minutat e fundit të shtesës, ku fati nuk ishte në anën e tyre.

Ndeshja pati edhe një moment të diskutueshëm, pas një pretendimi të korçarëve për një penallti, por gjyqtarja Emanuela Rusta e vlerësoi të pavlefshëm rastin dhe nuk drejtoi lojën nga pika e bardhë.

Me këtë barazim, Skënderbeu mbetet në krye të renditjes me 48 pikë, por i jep mundësinë Laçit të afrohet edhe më shumë në garën për vendin e parë.

"KORCA BOOM"