Pogradeci nuk ndalet, fitore e pastër dhe vend i tretë në tabelë

Pogradeci vazhdon formën pozitive në Kategorinë e Parë dhe konfirmon ambiciet për të qëndruar në zonat e sipërme të renditjes. Ekipi liqenor arriti një fitore të pastër 2–0 ndaj Kukësit, duke e dominuar takimin që në minutat e para.

Ndeshja u vendos shpejt, teksa Pius shënoi golin e parë në minutën e 6-të, pas një aksioni të shpejtë sulmues. I njëjti lojtar dyfishoi shifrat në minutën e 20-të, duke realizuar dopietë dhe duke i dhënë qetësi skuadrës së drejtuar nga trajneri Emiljano Çela.

Pas avantazhit të dyfishtë, Pogradeci administroi mirë lojën, duke kontrolluar ritmin dhe duke mos i lënë hapësira Kukësit për të rrezikuar portën. Fitorja u mbyll pa probleme, duke treguar pjekuri dhe organizim të mirë të skuadrës.

Me këtë sukses, Pogradeci ngjitet në kuotën e 29 pikëve dhe konsolidon vendin e tretë në renditje, duke u afruar ndjeshëm me zonën e kreut. Forma e mirë dhe vazhdimësia e rezultateve pozitive e bëjnë ekipin liqenor një pretendues serioz në këtë fazë të kampionatit.

"KORCA BOOM"