Ndryshime të mëdha në futboll, FIFA prezanton rregullat e reja për Botërorin 2026

Organi më i lartë i futbollit botëror, FIFA, ka miratuar disa ndryshime të rëndësishme në rregulloren e lojës për ndeshjet e ardhshme të FIFA World Cup 2026, me synimin për të shmangur parregullsitë dhe humbjen e kohës që shpesh shfrytëzohet nga skuadrat në momentet vendimtare të ndeshjeve.

Vendimi synon të rrisë cilësinë dhe ritmin e lojës në turneun që do të zhvillohet nga 11 qershori deri më 19 korrik në United States, Mexico dhe Canada.

Ndryshimet lidhen kryesisht me zëvendësimet, rivëniet anësore, trajtimin e dëmtimeve dhe ndërhyrjen e teknologjisë Video Assistant Referee (VAR).

Sa i përket zëvendësimeve, lojtarët që dalin nga fusha do të kenë vetëm 10 sekonda kohë për ta bërë këtë. Nëse vonohen, futbollisti që do të hyjë në lojë do të duhet të presë një minutë para se të futet në fushë.

Një tjetër ndryshim lidhet me rivëniet anësore. Topi duhet të hidhet në lojë brenda 5 sekondave; në të kundërt, rivënia do t’i kalojë skuadrës kundërshtare.

Edhe trajtimi mjekësor do të ketë rregulla të reja. Futbollistët që marrin ndihmë mjekësore në fushë do të duhet të dalin jashtë saj dhe të presin një minutë para se të rikthehen në lojë.

Ndërkohë, sistemi VAR do të ketë më shumë kompetenca. Ai do të mund të ndërhyjë edhe në rastet e kartonit të dytë të verdhë dhe në situata të goditjeve nga këndi, nëse konstatohet një gabim i qartë i arbitrave.

Këto masa synojnë të penalizojnë humbjen e qëllimshme të kohës, një taktikë që shpesh përdoret nga skuadrat kur kalojnë në avantazh për të ulur ritmin e ndeshjes. Me rritjen e rolit të VAR dhe kufizimet e reja për vonesat, FIFA synon që ndeshjet e Kupës së Botës 2026 të kenë më shumë kohë efektive loje dhe vendime më të sakta nga arbitrat.

“KORÇA BOOM”