Përleshje e dhunshme në zemër të Athinës: Shqiptarë dhe grekë përplasen me mjete të forta dhe thika

Një ngjarje e rëndë ka tronditur mbrëmjen e djeshme një nga zonat më të frekuentuara të Athinës, ku një konflikt fizik mes të rinjve ka degraduar në dhunë ekstreme. Ngjarja ndodhi në zonën e njohur të sheshit Hymettus, ku fillimisht u përfshinë pesë persona në një përleshje të ashpër, ndërsa më pas situata doli jashtë kontrollit kur në konflikt u përfshinë edhe të tjerë.

Sipas raportimeve të para, përplasja nisi për motive ende të paqarta dhe shpejt u shndërrua në një përballje të rrezikshme me përdorimin e thikave dhe mjeteve të forta. Si pasojë e përleshjes, tre persona mbetën të plagosur rëndë dhe u transportuan me urgjencë në spital. Mes të dëmtuarve është edhe një shtetas shqiptar 30-vjeçar, si dhe dy shtetas grekë të moshave 18 dhe 20 vjeç.

Policia greke ka reaguar menjëherë duke shkuar në vendngjarje dhe duke ndërhyrë për të neutralizuar situatën. Pas ndërhyrjes së shpejtë, oficerët kanë vënë në pranga dy të rinj të përfshirë në incident: një shqiptar 18-vjeçar dhe një grek 17-vjeçar, të cilët tashmë ndodhen në paraburgim dhe pritet të dalin sot përpara Prokurorisë.

Autoritetet greke kanë nisur hetimet për të zbardhur rrethanat e plota të ngjarjes dhe për të identifikuar pjesëmarrësit e tjerë që u përfshinë në përleshje. Shkaqet mbeten ende të paqarta, ndërsa pista e një konflikti mes grupeve rivale nuk përjashtohet.

Ngjarja ka shkaktuar reagime të shumta në opinionin publik, jo vetëm për shkak të dhunës së paprecedentë në një zonë urbane, por edhe për përfshirjen e të rinjve në episode të tilla ekstreme. Autoritetet lokale kanë bërë thirrje për qetësi dhe bashkëpunim me hetuesit, ndërsa qytetarët kërkojnë më shumë siguri në hapësirat publike.

“KORÇA BOOM”