Përmbytjet prekën mbi 400 hektarë tokë, Fermerët e MALIQIT: Dëmshpërblimet e premtuara nuk kanë mbërritur ende

Dy përmbytje masive, në muajin dhjetor të vitit të kaluar dhe në janar të këtij viti, bënë që më shumë se 400 hektarë tokë bujqësore në fushën e Maliqit të mbeteshin nën ujë, duke shkaktuar dëme të mëdha për fermerët.

Në atë kohë ishte ministri i Bujqësisë ai që premtoi dëmshpërblim për fermerët, por kjo gjë ende nuk ka ndodhur.

Geni Fraholli, një nga fermerët e fshatit Sheqeras, tregon se i gjithë prodhimi i mbjellë u dëmtua, ndërsa dëmshpërblimet e premtuara ende nuk janë marrë.

“Mua më u përmbytën 18 hektarë, shkon goxha, 7-8 milionë lekë, gjithë gjërat. Grurë dhe elb. Misrin ende nuk e mbjellim dot, sepse nuk ka ikur uji nga fusha. Na erdhi ministri, por nuk na dha. Bëmë gjithë dokumentet”, tha Fraholli.

Një gjë të tillë e pranon edhe drejtori i Bujqësisë në Bashkinë e Maliqit, Aurel Zenullari, i cili thotë se fermerët kanë të drejtë në kërkesën e tyre për dëmshpërblime, të cilat ende nuk janë dhënë.

“Fermerët kanë të drejtë. Në muajin dhjetor dhe janar kemi pasur disa dëmtime nga këto përmbytje. Kemi grurin që është i përmbytur, misrin që ishte i pakorrur dhe parcelat që nuk kanë mundësi të mbillen, pasi uji është ende prezent në këto sipërfaqe. Nga ana e bashkisë janë marrë masat, janë mbajtur procesverbalet, askush nuk është përjashtuar nga ky regjistrim. Janë përcjellë shkresat dhe jemi në pritje të një përgjigjeje, e cila ende nuk ka ardhur për fermerët”, Zenullari.

Bashkia e Maliqit ka përjashtuar nga detyrimi i taksave vendore fermerët që ende kanë tokat nën ujë, ndërsa dëmi ekonomik për ta mbetet shumë i madh./ Euronews

“KORÇA BOOM”