Qendërmbrojtësi që s’u kthye/ Talenti juglindor vazhdon larg Korçës

Erest Lamellari, një nga futbollistët e rinj që ka bërë emër si talent i dalë nga Korça, nuk do të jetë pjesë e Skënderbeut as këtë sezon. Edhe pse kishte pritshmëri që mbrojtësi i ri të rikthehej në ekipin korçar pas huazimit te Kukësi, burime të sigurta konfirmojnë se Lamellari ka zgjedhur të qëndrojë edhe për një tjetër sezon në radhët e skuadrës verilindore.

Qendërmbrojtësi 21-vjeçar, i cili është aktivizuar rregullisht me Kukësin sezonin e kaluar, ka treguar maturi dhe stabilitet në një pozicion shumë të ndjeshëm të fushës – një profil që Skënderbeut do t’i bënte shumë mirë, veçanërisht në ndërtimin e një mbrojtjeje solide me elementë të rinj, por të rritur në filozofinë e klubit.

Mungesa e rikthimit të tij në Korçë shihet si një mundësi e humbur për klubin, që në sezonet e fundit ka patur nevojë të qartë për forcim në prapavijë. Lamellari, si produkt i akademisë së Skënderbeut, mund të përfaqësonte jo vetëm vazhdimësinë e brezave të rinj, por edhe ndihmën konkrete në një repart që ka kërkuar shpesh stabilitet.

Nga ana tjetër, qëndrimi te Kukësi mund të jetë një hap i rëndësishëm për zhvillimin e tij profesional, me më shumë minuta në elitë dhe eksperiencë nën presionin e një klubi që ka pretendime të vazhdueshme.

Për tifozët korçarë, mbetet shpresa që ky largim të mos jetë i përhershëm dhe që në të ardhmen, Erest Lamellari të rikthehet për të dhënë kontributin e tij në fanellën që e rriti si futbollist.

“KORÇA BOOM”