Rritja e numrit të futbollistëve të huaj në superiore dhe rreziku për talentet vendase

Sipas të dhënave më të fundit, përqindja e futbollistëve të huaj në Kategorinë Superiore ka arritur një nivel rekord. Plot 35% e lojtarëve të regjistruar deri tani janë të huaj, shifër kjo që shënon një rritje të ndjeshme krahasuar me sezonet e kaluara.

Kujtojmë se në këtë sezon, rregullorja e re lejon që një skuadër të hedhë në fushë deri në 11 futbollistë të huaj në formacionin titullar. Ky ndryshim, ndonëse mund të rrisë nivelin konkurrues të kampionatit, ngre shqetësime serioze për të ardhmen e futbollit shqiptar.

Një strategji e tillë rrezikon të dëmtojë rëndë akademitë dhe zhvillimin e talenteve të rinj vendas, të cilët do ta kenë gjithnjë e më të vështirë të gjejnë hapësira në ekipet e para.

Për krahasim, Federata Kroate ka vendosur që nga sezoni i ri çdo ekip të jetë i detyruar të aktivizojë në formacion një lojtar U-21 me kombësi kroate. I njëjti rregull është zbatuar prej vitesh edhe nga Federata e Futbollit të Maqedonisë së Veriut, si një mënyrë për të garantuar rritjen dhe përfshirjen e talenteve të reja vendase në futbollin profesionist.

Këto modele të suksesshme nga vendet fqinje mund të shërbejnë si shembull për Shqipërinë, nëse synohet të ndërtohet një e ardhme e qëndrueshme për futbollin shqiptar.

“KORÇA BOOM”