Sa para fiton kryeministri Rama nga klikimet në Youtube? E zbulon eksperti

Në emisionin “Review” në Euronews Albania, drejtuesi i Agjencisë Acromax, Aldor Nini, ka dhënë detaje interesante lidhur me mënyrën se si politikanët shqiptarë përdorin platformat online, veçanërisht YouTube.

Nini u përgjigj edhe për pyetjen se sa para fiton kryeministri Edi Rama nga klikimet në kanalin e tij në YouTube. Eksperti shpjegoi se, megjithëse Rama ka midis 300 dhe 400 mijë shikues unikë në muaj, ai nuk ka një llogari të monetizuar në këtë platformë.

“Sipas statistikave që kemi hulumtuar, asnjë politikan në Shqipëri nuk ka një kanal në YouTube të monetizuar me qëllim gjenerimin e të ardhurave. Ata përdorin mediat online vetëm për të përçuar mesazhet politike,” tha Nini.

Ai shtoi se kryeministri Edi Rama nëpërmjet podcast-it të tij në YouTube nuk fiton asnjë lekë, pasi nuk e monetizon këtë përmbajtje. “Çdokush mund ta kontrollojë këtë duke hyrë nga një IP adresë jashtë Shqipërisë, për shembull nga Gjermania, dhe nuk do të shohë asnjë reklamë në videot e tij,” shpjegoi Nini.

Sipas tij, kjo tregon se motivi nuk është ekonomik, por politik. “Një kanal me 300-400 mijë shikues unikë në muaj është shumë i rëndësishëm për komunikimin politik, por një ‘view’ apo shikim i vetëm nuk do të thotë domosdoshmërisht sukses financiar, pasi një shikim mund të jetë edhe vetëm 20 sekonda,” theksoi eksperti.

Në përfundim, Aldor Nini nënvizoi se politikanët shqiptarë përdorin YouTube kryesisht si një mjet komunikimi politik dhe jo si një burim të ardhurash.

“KORÇA BOOM”