Shkodra “mbush” Shqipërinë me ka*nabis, Korça pa pothuajse asgjë

Një shtëpi bari, e zbuluar të dielën e 2 nëntorit në Malësinë e Madhe në Shkodër, është një nga operacionet e fundit të policisë gjatë vitit 2025 në betejën kundër kultivimit të kanabis sativa.

Shtëpitë e barit, të cilat janë përhapur gjithnjë e më shumë vitet e fundit dhe ku kanabisi kultivohet nën dritat e neoneve, paraqesin sfidën më të madhe për policinë që t’i gjurmojë. Brenda kësaj shtëpie u gjetën të paktën 1110 bimë kanabisi që po rriteshin nën llamba.

Gjatë këtij viti, shifrat zyrtare deri në fillim të nëntorit tregojnë përsëri një përhapje të gjerë të fenomenit, megjithëse më të reduktuar se më parë. Në total, në 12 qarqe, policia e shtetit gjeti 213,856 bimë dhe fidanë kanabisi. Krahasuar me vitin 2024, ky numër është më i ulët për 137,705 rrënjë dhe fidanë.

Qarku i Shkodrës konfirmohet sërish si më problematik, me mbi 87 për qind të rasteve të zbuluara dhe një total prej 186,460 bimësh dhe fidanësh të asgjësuar. I dyti në radhë është Fieri, me 9,305 bimë, ndjekur nga Lezha, Tirana, Durrësi, Dibra dhe Vlora. Numri më i ulët i bimëve të zbuluara është në qarkun e Korçës, me vetëm 4 bimë kanabisi.

"KORCA BOOM"