Shqipëria preferohet nga turistët “dorështrënguar” – alarm për industrinë e turizmit

Një turist europian shpenzon mesatarisht 91 euro për natë kur udhëton në një shtet tjetër të Europës, sipas të dhënave të publikuara nga Eurostat për vitin 2023. Për vendet e eurozonës, kjo shumë arrin në 93 euro për natë. Shifra përfshin akomodimin, ushqimin dhe pijet, transportin lokal, aktivitetet kulturore, rekreative dhe të tjera.

Të dhënat tregojnë një rritje të vazhdueshme të buxhetit të turistëve europianë, duke shënuar një kërcim nga 84 euro për natë në vitin 2022 dhe 77 euro në vitin 2019.

Ky tregues është i rëndësishëm për të kuptuar profilin ekonomik të turistëve që vizitojnë edhe Shqipërinë. Sipas INSTAT, italianët përbëjnë grupin e dytë më të madh të turistëve në Shqipëri, me rreth 11 për qind të hyrjeve në vend. Megjithatë, ata janë ndër më kursimtarët në Europë, duke shpenzuar mesatarisht vetëm 78 euro për natë, që është 14 për qind më pak se mesatarja europiane.

Në të njëjtat nivele janë edhe turistët francezë me 79 euro për natë, spanjollët dhe holandezët me nga 75 euro.

Ndër turistët që shpenzojnë më pak janë polakët dhe çekët, me rreth 50 euro për natë, pra thuajse gjysma e mesatares së Bashkimit Europian. Ky është një grup që viziton Shqipërinë përmes agjencive turistike dhe që vendoset kryesisht në zona si Golemi apo jugu i vendit. Sipas operatorëve turistikë, ata shpenzojnë pak dhe janë të ndjeshëm ndaj çmimeve.

Turoperatorët raportojnë se për vitin 2025 ka pasur shtim të kontratave me agjenci polake, megjithatë numri i vizitorëve individualë nga këto shtete është në rënie për shkak të rritjes së kostove dhe çmimeve, çka i ka shtyrë një pjesë të tyre drejt destinacioneve të tjera, si Kroacia.

Të dhënat zyrtare tregojnë se hyrjet e shtetasve polakë në Shqipëri për pesëmujorin e parë të këtij viti kanë rënë me 8.6 për qind në krahasim me të njëjtën periudhë të vitit të kaluar.

Edhe turistët nga Maqedonia e Veriut, që janë të tretët për nga numri i vizitave në Shqipëri, shpenzojnë pak.

Sipas Eurostat, në vitin 2021, ata shpenzonin mesatarisht 37 euro për natë. Greqia, me 287 mijë hyrje në vend, renditet e katërta, dhe qytetarët grekë gjithashtu janë ndër më kursimtarët në Europë, me vetëm 46 euro për natë.

Nga ana tjetër, turistët gjermanë janë ndër më bujarët. Ata shpenzojnë mesatarisht 117 euro për natë, dhe për pesëmujorin e parë të vitit 2025 kanë shënuar rritje me 29 për qind në hyrjet në Shqipëri. Gjermanët fillimisht vinin për ture kulturore, por tashmë kanë filluar të vijnë edhe për pushime verore.

Turistët që shpenzojnë më shumë në Europë janë austriakët, me 155 euro për natë, të ndjekur nga maltezët me 138 euro dhe islandezët me 131 euro. Vendet nordike si Norvegjia (127 euro) dhe Suedia (108 euro) gjithashtu tregojnë tendencë për të shpenzuar më shumë, duke preferuar shërbime me cilësi të lartë dhe akomodim të mirë.

Operatorët turistikë shqiptarë theksojnë se turistët me buxhet të lartë janë gjithnjë e më të ndjeshëm ndaj cilësisë së shërbimeve dhe infrastrukturës. Problemet si trafiku dhe mungesa e shërbimit cilësor po ndikojnë negativisht në përshtypjet e tyre, duke sjellë rënie në vlerësimet online dhe në interesin për të ardhmen.

Të dhënat tregojnë se destinacionet që ofrojnë cilësi të mirë, infrastrukturë të zhvilluar dhe shërbim profesional arrijnë të tërheqin turistë që janë të gatshëm të paguajnë më shumë, ndërsa vendet që bazohen te çmimet e ulëta kanë prirje të tërheqin turistë më të kursyer, kryesisht për turizëm sezonal.

“KORÇA BOOM”