Skënderbeu dhe Laçi marshojnë drejt Superiores, surprizë nga Burreli në Fier

Sot u zhvilluan gjashtë ndeshje të vlefshme për javën e shtatë të Kategorisë së Parë, me rezultate që treguan qartë se gara për ngjitjen në Superiore po bëhet gjithnjë e më e fortë.

Laçi dhe Skënderbeu morën fitore të rëndësishme në transfertë, duke konfirmuar synimet për rikthimin në elitën e futbollit shqiptar. Laçianët mposhtën Kukësin me rezultatin bindës 0-3, me gola nga Myrta (63'), Tresa (70') dhe Nërguti (72'). Ndërkohë, Skënderbeu siguroi tri pikë të arta falë një goli të vonë nga Tayo në minutën e 84-t në përballjen me Luftëtarin.

Në sfidën më të spikatur të javës, Besa dhe Pogradeci u ndanë në barazim 1-1. Greca kaloi Pogradecin në avantazh në minutën e 16-të, ndërsa Beqja barazoi shifrat në fillim të pjesës së dytë. Ndeshja u karakterizua nga intensitet i lartë dhe një gol i anuluar për Besën.

Kastrioti dhe Iliria ndanë nga një pikë pas një tjetër barazimi 1-1. Hoxha zhbllokoi ndeshjen për krutanët në minutën e 15-të, por Pjetraj riktheu ekuilibrin në minutën e 77-të.

Korabi mposhti Lushnjën 2-0, falë golave të Uollis dhe Reçit, duke vazhduar formën pozitive.

Ndërkohë, surpriza e javës erdhi nga Burreli, që fitoi 1-2 në transfertë ndaj Apolonisë. Rrapi ishte protagonist me dy gola (39’ dhe 72’), ndërsa për vendasit shënoi Umejiego.

“KORÇA BOOM”